Mahakma Excise North Zone Quetta mein 79wen Yaum-e-Azadi ki taqreeb, DG Muhammad Ayub Hazara ne cake kata

Quetta: Pakistan ke 79wen Yaum-e-Azadi ki munasibat se Mahakma Excise North Zone ke zere-e-ehtimam purwaqar taqreeb munaqid hui, jis mein Director General Excise North Zone Muhammad Ayub Hazara ne cake kata. Taqreeb mein Director Excise Naseebullah Mandokhail samet Mahakma Excise ke afsaran aur ahlkaron ne shirkat ki.

Afsaran ne ek doosre ko Yaum-e-Azadi ki mubarakbad di aur watan-e-azeez ki taraqqi, khushhali, istehkam aur salamati ke liye nek khwahishat ka izhar kiya.

Muhammad Ayub Hazara ne kaha ke Yaum-e-Azadi hamein buzurgon ki lazawal qurbaniyon aur jaddojehad ki yaad dilata hai, Pakistan ek azeem naimat hai aur is ki taraqqi o khushhali ke liye har shehri ko bharpoor kirdar ada karna chahiye. Unhon ne kaha ke Mahakma Excise ke afsaran o ahlkaar qaumi jazbe se faraiz anjaam de rahe hain aur awam ko behtar sahuliyaat ki faraahmi ke sath soobe mein qanoon ki amaldari aur hukumati umoor ki mouassir anjaam dehi mein apna kirdar jari rakhenge.

Taqreeb ke ikhtitam par Pakistan ki salamati, istehkam, taraqqi aur khushhali ke liye khusoosi dua ki gayi.

Tasveer: Bashukriya DGPR Balochistan