Maan aur bachche ki sehat ke baghair paidar taraqqi mumkin nahin: Dr Rubaba Khan Buledi

Quetta: Chief Minister Balochistan ki mushir bara-e-Women Development Department Dr Rubaba Khan Buledi ne kaha hai ke Balochistan mein khawateen, maaon aur bachchon ki sehat behtar banaye baghair haqiqi aur paidar taraqqi ka khwab sharminda-e-tabeer nahin ho sakta. Unhon ne kaha ke Essential Package of Health Services Balochistan buniyadi sehat ke nizam ko mazboot banane ki jaanib aham qadam hai, jis mein zacha o bacha ki sehat ko markazi haisiyat hasil honi chahiye.

Unhon ne kaha ke jughrafiyai phailao, dushwar guzar ilaqon aur tibbi sahuliyat tak rasai ke masail ke baais haml ke dauran khawateen ko barwaqt tibbi nigahdasht ki faraahmi aik bara challenge hai, is liye har hamila khatoon ko Antenatal Care (ANC), baqaida tibbi muaina, blood pressure aur haemoglobin ki janch, ghizai mushawarat, iron aur folic acid supplementation aur khatre ki alamaat ki barwaqt tashkhees faraham ki jaye.

Mehfooz zachagi aur nomolood ki nigahdasht

Dr Rubaba Khan Buledi ne kaha ke mehfooz zachagi ke liye Skilled Birth Attendance buniyadi ahmiyat rakhti hai; har zachagi tarbiyat yafta aur mustanad tibbi amle ki nigrani mein ho aur pechida cases ke liye buniyadi marakiz-e-sehat se tehsil aur zilai hospitalon tak muassir Referral System maujood ho. Unhon ne kaha ke Postpartum Hemorrhage, Hypertensive Disorders of Pregnancy aur Sepsis jaisi pechidagian maan ki zindagi ke liye khatra ban sakti hain, is liye marakiz-e-sehat par zaroori adwiyat, aalat aur tarbiyat yafta amle ki dastiabi nagazir hai, jabke Newborn Care, Early Breastfeeding, Thermal Care aur Neonatal Resuscitation ko buniyadi sehat ke nizam ka lazmi hissa banana hoga.

Unhon ne kaha ke bachchon ki sehat ka aghaz maan ki sehat aur haml ke dauran ghizai nigahdasht se hota hai; kam wazan, ghizai kami aur khoon ki kami ka barah-e-raast asar nomolood par parta hai, is liye Maternal Nutrition, Breastfeeding, Immunization aur Growth Monitoring ko marboot andaz mein aage barhana zaroori hai.

Soobai mushir ne kaha ke RMNCH services ko buniyadi marakiz-e-sehat ki satah par mazboot banana hukumat ki tarjeeh hona chahiye. 164 buniyadi marakiz-e-sehat ka faal hona aham pesh raft hai, taham asal kamyabi tab hogi jab in marakiz par adwiyat, tashkhisi khidmat aur tarbiyat yafta health care workers mustaqil dastiab hon. Unhon ne Community Health Workers aur Lady Health Workers samet front line health staff ki istadad-e-kar barhane par bhi zor diya.

Dr Rubaba Khan Buledi ne kaha ke aik doctor ki haisiyat se woh samajhti hain ke behtareen policy wohi hai jis ke nataij maan aur bachche ki sehat ke ishariyon mein nazar aayen, aur kamyabi ka miyar sirf naye marakiz ka qayam nahin balke Maternal Mortality, Neonatal Mortality aur Infant Mortality mein kami hai. Unhon ne kaha ke Balochistan ki har maan ko miyari tibbi nigahdasht, mehfooz zachagi aur hungami surat mein barwaqt ilaj ka haq hasil hai, aur hukumat-e-Balochistan mehkama-e-sehat aur tamam sharakat daron ke sath mil kar iqdamat jari rakhegi.

Tasveer: bashukriya DGPR Balochistan