Loralai: Mekhtar bazar mein Food Authority ki karrawai, 15 food karobaron ka moaina, 6 par jurmane

Loralai: Balochistan Food Authority ki zonal food safety team ne zila intezamiya ke taawun se tehsil Mekhtar ke Mekhtar bazar mein mushtarka karrawai karte hue 15 food karobaron ka moaina kiya, 6 marakiz par jurmane aid kiye aur 6 food karobaron ko islahi notices jari kiye.

Karrawai se qabl Balochistan Food Authority ne Assistant Commissioner tehsil Mekhtar Israr Ahmed Mandokhail se mulaqat ki, jis mein milawat shuda, ghair miyari, mamnoa aur muzir-e-Sehat ashya-e-khurdonosh ke khilaf mushtarka karrawaiyan mazeed moassir banane par ittefaq kiya gaya.

Moainay ke dauran char general stores se mamnoa gutka, chaliya, expired biscuit, cakes, chocolates, candies, bachon ki masnoaat aur ghair miyari mashrubat baramad hone par jurmane kiye gaye aur tamam mamnoa o expired ashya moqe par zabt karke talaf kar di gayin.

Qaumi shahrah par waqe do restaurants ko naqis safai, ghair miyari storage, gande bartanon, zati safai ke fuqdan aur Food Authority ke SOPs ki khilaf warzi par jurmana kiya gaya. Ilaqa makinon ne mushtarka karrawaiyon ko sarahte hue mehfooz khorak ki farahmi ke liye aise iqdamat ko khush aamind qarar diya.

Tasveer: bashukriya DGPR Balochistan