Loralai mein Pakistan, Saudi Arabia, Turkiye difaai muahide ki khushi mein Quetta aur Loralai ka khusoosi Football match

Loralai: Pakistan, Saudi Arabia aur Turkiye ke darmiyan Makkah Mukarramah mein tay pane wale tarikhi mushtarka difaai muahide ki khushi mein zila intizamia Loralai ke zer-e-ehtemam Boys College Football ground Loralai mein aik khusoosi Football match ka inaqad kiya gaya. Deputy Commissioner Loralai Captain (r) Muhammad Haseeb Shuja ki hidayat par munaqida is match mein Quetta aur Loralai ki teamon ne hissa liya.

Match ka maqsad tino baradar mumalik Pakistan, Saudi Arabia aur Turkiye ke darmiyan ikhuwwat, yakjehti aur bahmi taawun ke jazbe ko ujagar karna aur tarikhi muahide ki khushi manana tha.

Deputy Commissioner Captain (r) Muhammad Haseeb Shuja ne kaha ke Makkah Mukarramah mein 7 August 2026 ko tay pane wala mushtarka difaai muahida Pakistan, Saudi Arabia aur Turkiye ke darmiyan mazboot baradarana talluqat aur mushtarka salamati ke azm ka mazhar hai, aur yeh khitte mein aman, salamati aur istehkam ke farogh ki janib aik aham pesh-raft hai.

Unhon ne kaha ke Khel naujawanon ko musbat sargarmiyon ki janib raghib karne ke sath sath muashre mein ittehad, bhai-chare, bardasht aur hum-ahangi ke farogh ka muassir zariya hain, aur Loralai mein khusoosi Football match ka inaqad isi jazbe ki akkasi karta hai.

Deputy Commissioner ne kaha ke Pakistan, Saudi Arabia aur Turkiye ke awam ke darmiyan mohabbat aur bhai-chare ke dairina rishte qaim hain aur aise musbat iqdamat in talluqat ko mazeed ujagar karne mein aham kirdar ada karte hain. Unhon ne is azm ka izhar kiya ke zila intizamia Loralai naujawanon ko Sehat mand aur musbat sargarmiyon ke liye bharpoor mawaqe faraham karti rahegi.

Is mauqe par khilariyon aur shaiqeen ne Pakistan, Saudi Arabia aur Turkiye ke darmiyan dosti, ittehad aur bhai-chare ke jazbat ka izhar karte hue aman, istehkam aur khushhali ke paigham ko ujagar kiya.

Tasveer: Bashukriya DG PR Balochistan