Loralai mein Municipal Committee ki khusoosi safai muhim, nalon aur galiyon ki safai, darakhton ko pani

Loralai: Soobai hukumat ke vision, Commissioner Loralai Division Wali Muhammad Barech ke ahkamat aur Chief Officer Municipal Committee Loralai Mohibullah Baloch ki hidayat aur nigrani mein shehar bhar mein khusoosi safai muhim bharpoor andaz mein jari hai. Shehriyon ko saaf, sehat mand aur khushgawar mahol ki faraahmi ke liye Municipal Committee ka amla mukhtalif ilaqon mein nalon, galiyon, barsati guzargahon aur kuray ki barvaqt safai yaqeeni bana raha hai.

Muhim ke douran Mulla Khidr Neka qabristan ke barsati nale, Levies Line, Hareef Gali, Kamran Sahib Tip, SSP daftar, Thanda Masjid, Dr Saadat hospital, Hanzala Masjid, Ameer Zaman Mohalla, AQ Khan school, Chikai Gali, Jan Muhammad Gali, Kabari school aur purane NADRA daftar ke atraf nalon aur galiyon ki safai ki gayi, jabke awami shikayat mausool hone par baaz maqamat par dobara safai bhi ki gayi. Operation mein tractor trolley, Suzuki aur deegar machinery istemal ki gayi.

Isi silsile mein shehar ke mukhtalif maqamat par lagaye gaye darakhton ko baqaidagi se pani diya gaya taake Shajarkari muhim muassir ho, darakhton ki behtar nashonuma yaqeeni bane aur shehriyon ko sarsabz, saaf suthra aur khushgawar mahol muyassar aaye.

Chief Officer Mohibullah Baloch ne amle ko hidayat ki ke safai muhim ko mazeed muassir banaya jaye, tamam ilaqon mein bila taatal safai aur nikasi-e-aab ka nizam faal rakha jaye aur shehri masail fori hal kiye jayen. Unhon ne shehriyon se appeal ki ke woh safai barqarar rakhne mein Municipal Committee se taawun karen, kachra muqarrara maqamat par talaf karen aur shehar ko saaf, sarsabz aur khoobsurat banane mein bharpoor kirdar ada karen.

Tasveer: Bashukriya DGPR Balochistan