Loralai mein Insidad-e-Tajawuzat Committee ka ijlas, sarkari arazi aur shahraahon se bila imtiaz Tajawuzat hatane ki hidayat

Loralai: Additional Deputy Commissioner General Ali Nawaz Jamali ki zair-e-sadarat zilai Insidad-e-Tajawuzat Committee ka aham ijlas munaqid hua, jis mein zila bhar mein sarkari arazi, shahraahon, sarkon, bazaron aur deegar awami maqamat par qaim ghair qanooni Tajawuzat ke khilaf jari karrawaiyon ka tafseeli jaiza liya gaya.

Mutalliqa mahkamon ke afsaran ne zila mein Tajawuzat ki maujooda surat-e-haal, nishandahi kiye gaye maqamat aur ab tak ki karrawaiyon par committee ko briefing di. Is mauqe par kaha gaya ke sarkari arazi, sarkon ke kinaron, footpaths aur bazaron mein ghair qanooni tameeraat aur qabzon se na sirf traffic ki rawani mutasir hoti hai balke shehriyon ko aamad-o-raft mein shadeed mushkilat ka samna karna padta hai.

Bila imtiaz karrawai aur musalsal nigrani

Ijlas mein hukkam ko hidayat ki gayi ke Tajawuzat ke khilaf bila imtiaz, qanooni aur mowassar karrawai kisi dabao ya tafreeq ke baghair yaqeeni banayi jaye, sarkari amlak aur awami raste wagzar karaye jayen aur is baat ko yaqeeni banaya jaye ke dobara Tajawuzat qaim na hon. Committee ne hidayat ki ke karrawai se qabl qabizeen ki nishandahi, record ki tayyari aur zaroori qanooni taqaze mukammal kiye jayen aur karrawai ke dauran tamam idare baahmi rabte aur taawun ko yaqeeni banayen.

Ijlas mein faisla kiya gaya ke aham shahraahon, tijarati markaz aur awami maqamat ki baqaidagi se nigrani ki jayegi aur Tajawuzat ke dobara qayam ki surat mein fori karrawai ki jayegi. Zilai intizamia ne wazeh kiya ke traffic ki rawani, paidal guzargahon ki bahali aur sarkari arazi ke tahaffuz ke liye Insidad-e-Tajawuzat muhim ko mazeed mowassar banaya jayega.

Intizamia ne shehriyon, tajiron aur dukandaron se appeal ki ke woh sarkari arazi, footpaths aur sarkon par qabze ya saman rakhne se gurez karen aur taawun karen taake Loralai shehar ko Tajawuzat se paak aur munazzam banaya ja sake. Intizamia ne azm zahir kiya ke qanoon ki baaladasti, sarkari amlak ke tahaffuz aur shehriyon ko saaf, mehfooz aur kushada raston ki farahemi ke liye iqdamat tasalsul se jari rahenge.

Tasveer: Bashukriya DGPR Balochistan