Loralai: Deputy Commissioner Haseeb Shuja ka BSDI mansoobon ka daura, digital library, khawateen gymnasium aur futsal grounds ka muaina

Loralai: Deputy Commissioner Loralai Captain (retd) Muhammad Haseeb Shuja ne Balochistan Special Development Initiative (BSDI) ke tahat Loralai mein jari mukhtalif tarqiyati mansoobon ka tafseeli daura kiya aur taameeraati kaam, pesh raft aur miyar ka mauqe par jaiza liya. Is mauqe par XEN B&R Ahmad Din, Additional Deputy Commissioner (General) Ali Nawaz Jamali samet mutaliqa mahkamon ke afsaran aur contractors bhi mojood the.

Deputy Commissioner ne sab se pehle digital library aur khawateen gymnasium ke mansoobon ka muaina kiya. Hukkam ke mutabiq donon mansoobon ka grey structure takmeel ke aakhri marahil mein hai. Deputy Commissioner ne XEN aur contractor ko kaam ki raftar tez karne, zaroorat ke mutabiq labour barhane aur mansoobe muqarrara muddat mein mukammal karne ki hidayat ki, aur wazeh kiya ke raftar ke saath miyar par koi samjhauta bardasht nahin hoga.

BRC futsal ground aur girls college ground

Unhon ne BRC futsal ground Loralai ka bhi daura kiya. Hukkam ke mutabiq yeh mansooba dhai maah se bhi kam arse mein takmeel ke aakhri marahil mein dakhil ho chuka hai, astro turf bichane ka kaam mukammal ho gaya hai jabke silica sand aur rubber infill ka kaam jari hai. Deputy Commissioner ne material ke miyar ko yaqeeni banane aur baqi kaam jald mukammal karne ki sakhti se hidayat ki aur kaha ke awami funds se banne wale mansoobe derpa, miyari aur awam ke liye haqeeqi maanon mein mufeed hone chahiyen.

Government Girls College Loralai mein BSDI ke tahat taameer hone wala futsal ground bhi mukammal kar liya gaya hai, jis se talibaat ko Taleem ke saath khelon aur sehat mand jismani sargarmiyon ke liye mehfooz aur mauzoon sahulat muyassar aayegi. Deputy Commissioner ne kaha ke naujawan nasl bil-khusoos talibaat ko khelon ki behtar sahuliyat dena waqt ki zaroorat hai, kyunke aabad maidan naujawanon ko musbat sargarmiyon ki taraf raghib karte hain.

IT hub iftetah ke liye tayyar

Deputy Commissioner ne IT hub Loralai ki pesh raft ka bhi jaiza liya, jo aainda dinon mein iftetah ke liye tayyar hai. BSDI ke tahat qaim is hub ka maqsad naujawanon ko jadeed digital Technology se roshanas karana, nayi maharatein sikhana aur online kaam, digital skills aur jidat ke shobon mein rozgar ke mauqe paida karna hai.

Muhammad Haseeb Shuja ne kaha ke tarqiyati mansoobon ka asal maqsad awam ko barah-e-raast sahuliyat faraham karna aur paidar taraqqi ki bunyad mazboot karna hai. Unhon ne tamam mansoobon ki musalsal nigrani, miyar ki yaqeen dahani aur muqarrara muddat mein takmeel ki hidayat ki aur kaha ke zilai intizamiya is silsile mein tamam mahkamon se mukammal taawun jari rakhegi.

Tasveer: Bashukriya DGPR Balochistan