Loralai: Commissioner Wali Muhammad Barech ki zer-e-sadarat NGOs ka rabita ijlas, mansoobon ka data share karne ki hidayat

Loralai: Commissioner Loralai Division Wali Muhammad Barech ki zer-e-sadarat International aur maqami ghair sarkari tanzeemon (INGOs/NGOs) ka ek aham rabita ijlas Commissioner Office Loralai mein munaqid hua.

Ijlas ka maqsad Division bhar mein jari aur mujawwaza taraqqiati, falahi aur insani hamdardi ke mansoobon ka jaiza lena, zilai intizamia aur imdadi idaron ke darmiyan bahami taawun ko mazid mouassar banana aur awam ko faraham ki jane wali khidmat ka miyar behtar banana tha.

Ijlas mein BRSP, Muslim Aid, Helping Hand, Society, UNHCR, Akhuwat, Tameer-e-Khalq Foundation, UNICEF, Mercy Corps, Taraqqi Foundation, Danish, Sahar aur Islamic Relief samet mutaddid International aur maqami tanzeemon ke divisional o zilai numainDon ne shirkat ki.

Ijlas ke dauran Division aur Azla mein jari taraqqiati o samaji behbood ke mansoobon, aainda shuru kiye jane wale programmon aur un ki pesh raft par tafseeli jaiza report pesh ki gayi. Shurka ne field mein darpesh intizami, security aur deegar amali mushkilat se agah kiya aur un ke barwaqt aur mouassar hal ke liye mukhtalif tajaweez pesh kin.

Baqaida reporting ka nizam waza karne ka faisla

Ijlas mein ittefaq kiya gaya ke tamam ghair sarkari tanzeemein apne mansoobon par amal dar amad ke dauran zilai intizamia ke sath mukammal rabita aur taawun yaqeeni banayengi taake mansoobon ke samraat barwaqt aur shaffaf andaz mein mustahiq afrad tak pahunch saken. Mansoobon ki nigrani, shaffafiyat aur karkardagi behtar banane ke liye divisional intizamia ke sath baqaida aur miyari reporting ka nizam waza karne ka bhi faisla kiya gaya, jis ke tahat mansoobon ki pesh raft, ahdaf (Target Indicators) aur hasil shuda nataij se mutaliq waqtan fawqtan reports share ki jayengi.

Ijlas se khitab karte hue Commissioner Wali Muhammad Barech ne kaha ke hukumat Balochistan awami falah o behbood, paidar taraqqi aur samaji khidmat ki farahmi ke liye ghair sarkari tanzeemon ke kirdar ko qadr ki nigah se dekhti hai. Unhon ne kaha ke tamam idare apni sargarmiyon mein shaffafiyat, jawabdehi aur bahami rabite ko farogh dein taake wasail ka mouassar istemal mumkin ho aur taraqqiati mansoobon ke haqiqi fawaid aam shehriyon tak pahunchen.

Unhon ne kaha ke divisional intizamia tamam falahi aur taraqqiati idaron ke sath bharpoor taawun jari rakhegi, tahamu tamam tanzeemon ko mutalliqa zilai intizamia ke sath peshgi rabita, hukumati policyon ki pabandi aur maqami zaruriyat ko madde nazar rakhte hue mansoobabandi karna hogi. Un ka kehna tha ke taleem, Sehat, peene ke saaf pani, ghizaiyat, khawateen o bachon ki falah, rozgar ke mauqe aur mausmiyati tabdeeli jaise shobon mein marboot hikmat-e-amli waqt ki aham zaroorat hai.

Commissioner ne hidayat ki ke tamam NGOs aur INGOs apni sargarmiyon, funding, ahdaf aur mansoobon ki takmeel se mutaliq baqaida data divisional intizamia ke sath share karen taake taraqqiati sargarmiyon ki mouassar nigrani, wasail ki munsifana taqseem aur idaron ke darmiyan behtar hum ahangi yaqeeni banayi ja sake.

Ijlas ke ikhtitam par tamam shurka ne azm zahir kiya ke woh zilai o divisional intizamia ke sath qareebi rabita barqarar rakhte hue awami falah, gharbat ke khatme, taleem, Sehat aur insani hamdardi ke mansoobon par mushtarka tor par kaam karenge taake Loralai Division mein paidar aur mutawazin taraqqi ke ahdaf hasil kiye ja saken.

Tasweer: Bashukriya DGPR Balochistan