Lasbela University (LUAWMS) aur China ki Dalian Ocean University mein marine sciences par mufahimati yaddasht par dastakhat

Lasbela: MNA Lasbela o wafaqi wazir-e-tijarat Jam Kamal Khan Alyani ki hidayat par Lasbela University of Agriculture, Water and Marine Sciences (LUAWMS) Pakistan ke Vice Chancellor Professor Dr Abdul Malik Tareen ki sarbarahi mein aik aala satah wafd ne Dalian Ocean University (DLOU) China ka daura kiya. Daure ka maqsad samundari uloom ke shobe mein taleemi ishtirak ko farogh dena aur dono jamiaat ke darmiyan taweel almiyadi taawun ko mazboot banana tha.

Is mauqe par dono jamiaat ke mabain aik mufahimati yaddasht (MoU) par dastakhat kiye gaye, jo China aur Pakistan aur dono jamiaat ke darmiyan taleemi o science shirakatdari ko mazeed wusat dene ki jaanib aik aham pesh raft hai.

LUAWMS ke wafd mein Registrar Balach Rasheed, Education Faculty ke Dean Ahmed Nawaz Khosa aur Dr Mohsin Ali Kalhoro shamil the. Wafd ka istaqbal Dalian Ocean University ke Vice President Prof. Liu Wenhe ne kiya. Is mauqe par Office of International Exchange and Cooperation aur College of Marine Science and Environment ke numainde bhi mojood the, jabke ijlas aur technical nishaston mein Marine College ke Dean Prof. Zhongming Huo, Prof. Sang, Prof. Tian Jie aur Prof. He ne bhi shirkat ki.

Taawun ke shobe aur talaba ke liye wazaif

Ijlas ke dauran dono jamiaat ne apni taleemi salahiyaton, tehqeeqi kamyabiyon aur mustaqbil ki taraqqiyati hikmat amliyon par jamey roshni dali. Fareqain ne marine big data aur uske itlaqat, samundari mahauliyati tabdili, jadeed abi zaraat (aquaculture), fisheries science aur samundari wasail ke intezam jaise shobon mein taawun barhane par ittefaq kiya.

Alawa azin mushtarka tehqeeqi mansubon, asatza aur talaba ke tabadla programmon, mushtarka science isha’aton, post graduate talaba ki mushtarka nigrani aur Belt and Road Initiative (BRI) ke tehat mushtarka tehqeeqi platforms ke qayam par bhi ittefaq kiya gaya.

Muzakrat ka aik aham nateeja yeh bhi tha ke mustaqbil qareeb mein LUAWMS ke numaya talaba ko wazaif faraham kiye jayenge taake woh marine science, fisheries, oceanography aur mahauliyati uloom ke shobon mein Dalian Ocean University se Bachelor, Masters aur PhD ki taleem hasil kar ke mutaliqa shobon ki taraqqi mein apna kirdar ada karen. Is iqdam se taleemi istedad mein izafa hoga, aala tarbiyat yafta afradi quwwat tayyar hogi aur dono jamiaat ke darmiyan science taawun ke naye mawaqe paida honge.

Wafd ne daure ke dauran Dalian Ocean University ki jadeed tehqeeqi laboratories, abi zaraat ke tehqeeqi o afzaishi markaz aur Northern Marine Data Engineering Application Center ka bhi daura kiya, jahan unhon ne jadeed tehqeeqi infrastructure aur jari science mansubon ka tafseeli mushahida kiya. LUAWMS ke wafd ne undergraduate aur post graduate talaba se mulaqaten kien, asatza ke sath ilmi tabadla khayal kiya aur samundari uloom, fisheries, mahauliyati tehqeeq aur aala taleem ke mukhtalif pehluon par tajurbat aur malumat ka tabadla kiya.

Wafd ke daura-e-China ne dono idaron ke darmiyan bahmi etemad ko mazeed mustahkam kiya aur mustaqbil mein mushtarka taleemi o tehqeeqi taawun ki nai rahein hamwar kien. Daure ke ikhtitam par dono jamiaat ne is azm ka aada kiya ke woh taleemi miyar, science jidat, afradi quwwat ki taraqqi aur payedar bahri taraqqi ke farogh ke liye aik mazboot aur derpa strategic shirakatdari qayam rakhengi.

Naw dastakhat shuda mufahimati yaddasht dono idaron ke darmiyan taleemi mawaqe, mushtarka tehqeeq aur awami rawabit ke farogh ke liye mazboot bunyad faraham karegi, jabke China aur Pakistan ke mabain derina dosti aur science taawun ko mazeed mustahkam banane mein bhi aham kirdar ada karegi.

Wazeh rahe ke wafaqi wazir-e-tijarat Jam Kamal Khan Alyani ki kawishon se Lasbela University Pakistan ki pehli marine university ki haisiyat se taleemi shobe mein numaya maqam aur kamyabi ki nai manzilen tay kar rahi hai, jabke Governor Balochistan Sheikh Jaffar Khan Mandokhail ki khusoosi dilchaspi ki badaulat ise taleemi shobe ki taraqqi ki jaanib aham pesh raft tasawwur kiya ja raha hai.

Tasveer: Bashukriya DGPR Balochistan