Lahore High Court ka 39 saal purane arazi case par faisla, takmeel ka dawa mustarad

Justice Muzammil Akhtar Shabbir ne Mian Inam Elahi aur deegar ki jaanib se daer doosri appeal par faisla jaari kiya.

Darkhwast guzaron ne 27 July 1987 ko 199 kanal 9 marla arazi ke liye das lakh rupay ke iwaz muahida baya kiya tha, jis mein ek lakh rupay bataur bayana ada kiye gaye the. Darkhwast guzaron ke mutabiq baqi raqam ada karke registry mukammal ki jani thi, taham fareeq-e-mukhalif ne muahide par amal daramad nahin kiya.

Adalat ne qarar diya ke muahide mein takmeel ke liye teen maah ki muddat darj thi, taham koi makhsoos tareekh muqarrar nahin ki gayi thi, is liye qanoon-e-tahdeed-e-muddat ke Article 113 ke tahat muddat ka aghaz us waqt hua jab darkhwast guzaron ko muahide se inkar ka ilm hua.

Faisle ke mutabiq darkhwast guzaron ke apne gawah ne bayan diya ke teen sale deed ke musawwade 15 September 1987 ko Malik Muhammad Ashraf ko dastakhat ke liye diye gaye, jinhon ne usi roz dastakhat karne se inkar kar diya tha. Lahore High Court ne qarar diya ke sale deed par dastakhat se inkar hi muahide par amal daramad se inkar ka wazeh izhar tha.

Adalat ne qarar diya ke 15 September 1987 se teen saal ki muddat shuru hui aur 15 September 1990 ko khatam ho gayi, jabke darkhwast guzaron ne muahide ki takmeel ka dawa December 1997 mein daer kiya, jo muqarrara muddat se saat saal se zaid takheer se daer kiya gaya.

Lahore High Court ne mazeed qarar diya ke 26 November 1997 ko bheja gaya qanooni notice nayi wajah-e-dawa paida nahin kar sakta, kyunke ek martaba qanooni muddat shuru ho jaye to baad mein pesh aane wala koi waqia us muddat ko dobara shuru nahin karta. Adalat ne qarar diya ke darkhwast guzar taweel arse tak khamosh rehne ki bhi tasalli bakhsh wazahat nahin kar sake.

Adalat ne qarar diya ke matehat adalaton ne dawe ko muddat-e-miyad se bahar qarar dekar durust faisla kiya, faislon mein koi qanooni ya daera-e-ikhtiyar ki khami nahin, lihaza doosri appeal merit na hone ke baais khaarij kar di gayi.