Pakistan under 18 baseball team ne America mein alami title jeet liya

Florida: Pakistan ki under 18 baseball team ne amriki riyasat Florida mein hone wale tournament ke final mein Paraguay ko 11-0 se shikast de kar under 18 category ka title apne naam kar liya.

“World Comes to the Palm Beaches” (Powered by Prospect Wire 21) nami tournament 21 se 25 October tak West Palm Beach ke CACTI Park mein khela gaya, jo Houston Astros aur Washington Nationals ki spring training ka home ground hai.

Yeh event 2017 mein shuru hua tha aur is mein chhe barrazamon ke 30 se zaid mumalik ke khilari shirkat kar chuke hain. Muqablon mein under 12, under 15, under 18 aur 18 saal se zaid umar ke khilariyon ki open category shamil hai.

Pakistan ki under 18 team ko Pakistan Baseball Association North America ne munazzam kiya. Association ne Social Media par team ko mubarak baad dete hue kaha ke yeh kamyabi program ki taraqqi ka saboot hai. Is ka maqsadba-salahiyat Pakistani khilariyon ko mauqe faraham karna aur unhein aala satah par khelne ka platform dena hai.