Khuzdar ke District Council Hall mein Khuli Kachehri, Assistant Commissioner Abdul Hafeez Kakar aur Major Asrar ne shikayat sunin

Khuzdar: Deputy Commissioner Khuzdar Abdul Razzaq Sasoli ki hidayat par awami masail ke fori hal aur zilai intizamia se barah-e-raast rabta moassir banane ke liye District Council Hall Khuzdar mein Khuli Kachehri munaqid hui, jis ki sarbarahi Assistant Commissioner Khuzdar Abdul Hafeez Kakar aur Kalat Scouts Khuzdar ke Major Asrar ne mushtarka tor par ki.

Shehriyon ne badi tadad mein shirkat kar ke apne masail bila jhijhak tehriri aur zabani tor par pesh kiye. In mein taleem, peene ke saaf pani aur Sehat ki sahuliyat mein behtari, adviya ki dastiyabi, ambulance service, fire brigade ka qayam, taleemi nizam ki behtari, sarkon ki tameer o bahali, peene ke pani ki munsifana taqseem aur Aman o Aman samet deegar bunyadi masail shamil the.

Khuli Kachehri mein District Education Officer Abid Hussain Baloch, District Health Officer Dr Abdul Hameed Lehri, District Livestock Officer Dr Muhammad Anwar Zehri, XEN PHE Abdul Rauf Qambrani, SDO B&R Niaz Ahmed Zehri, PPHI ke DM Saddam Hussain, Deputy Manager PPHI Nasir Ahmed, Anjuman-e-Tajiran ke numainde Muhammad Iqbal Lango, Hindu Panchayat ke Seth Jawari Lal, Sunil Kumar aur tamam zilai mahkamon ke sarbarah ya numainde mojood the. Unhon ne mutaddid masail ke hal ke liye mauqe par ahkamat jari kiye, jabke baaz masail fori karwai ke liye mutalliqa mahkamon ko bhijwa diye gaye.

Assistant Commissioner Abdul Hafeez Kakar ne kaha ke mojooda hukumat awami falah o behbood ko awwalin tarjih samajhti hai aur Khuli Kachehriyan awam aur zilai intizamia ke darmiyan barah-e-raast aur moassir rabte ka behtareen zariya hain. Unhon ne kaha ke samne aane wale tamam masail tarjihi bunyadon par hal kiye jayenge aur mahkamon ko fori iqdamat ki hidayat di gayi hai.

Kalat Scouts ke Major Asrar ne kaha ke Balochistan Special Development Initiative (BSDI) ke tehat zila Khuzdar mein mutaddid taraqqiyati mansoobe mukammal kiye ja chuke hain, jabke kai deegar mansoobon par tezi se kaam jari hai, jin ki takmil se bunyadi sahuliyat ki faraahmi yaqeeni banane aur awami masail mein numaya kami lane mein madad milegi.

Tasveer: Bashukriya DGPR Balochistan