Khuzdar: Clerk Association aur qabaili fareeq ka zameeni tanaza, Deputy Commissioner Abdul Razzaq Sasoli ki sadarat mein ijlas

Khuzdar: Clerk Association aur muqami qabaili afrad ke darmiyan jari deerina zameeni tanaze par Deputy Commissioner Khuzdar Abdul Razzaq Sasoli ne dono fareeqain ko baat cheet aur masle ke pur-amn hal ke liye apne daftar talab kiya. Is mauqe par Assistant Commissioner Wadh Akbar Ali Mazarzai bhi maujood the.

DC office mein Deputy Commissioner ki zair-e-sadarat ijlas mein dono fareeqain ka mauqif tafseel se suna gaya. Zaraye ke mutabiq sarkari mulazimeen ka mauqif hai ke mazkura arazi hukumat ki janib se unhein dahaiyon qabl baqaida taur par allot ki gayi hai, jabke qabaili fareeq is mein se ek hisse ko apni milkiyat qarar dete hue adalat se rujoo karne aur stay hasil karne ka daawa kar raha hai.

Patwariyon se record talab

Ijlas mein fareeqain ke darmiyan kafi der tak bahas o mubahisa hua. Deputy Commissioner Abdul Razzaq Sasoli ne dono atraf ko sunne ke baad wazeh kiya ke zilai intizamiya ka maqsad kisi ki haq talfi nahin balke qanoon, record aur insaf ke taqazon ke mutabiq masle ka mustaqil hal nikalna hai.

Faisla kiya gaya ke mamle ki mazeed chhan been ke liye mutalliqa patwariyon se zameen ka mukammal record aur report talab ki jayegi, aur Juma ke roz dobara mushtarka baithak munaqid ki jayegi jis mein report ki roshni mein hatmi faisla kiya jayega. Taham is nashist ke ikhtitam tak zameen ke masle par deadlock barqarar raha.

Ijlas mein All Parties Shehri Action Committee Khuzdar ke chairman Bashir Ahmed Jattak, General Secretary Abdul Qadeer Zehri, Maulana Muhammad Ishaq Shahwani, Mir Abdul Rehman Zehri, Hafiz Hameedullah Mengal, Abdul Hameed Baloch, Juma Khan Shakrani, Abdullah Shahwani, Mir Ashraf Ali Mengal, Safar Khan Mengal, Munir Ahmed Zehri, Mir Idrees Zehri, Dr Huzoor Bakhsh Zehri aur Advocate Ghulam Nabi Mengal samet deegar numainde maujood the. Clerk Association ki janib se Manzoor Ahmed, Noshad, Aslam Zehri, Naseer Khiazai wa deegar ne shirkat ki, jabke qabaili umaidin mein Malik Abdul Lateef Shahwani, Abdul Kabeer Shahwani wa deegar shareek the.

Tasveer: Bashukriya DGPR Balochistan