Kam umri ki shadiyon ka khatima: Balochistan Women Commission aur Islamic Relief mein mufahimati yaddasht par dastakhat

Islamabad: Balochistan Commission on the Status of Women (BCSW) ki chairperson mohtarma Kiran Baloch ne 14 September ko Islamabad mein Islamic Relief ke sath mufahimati yaddasht (MoU) par dastakhat kiye. Is moqe par rukn commission Mushtaq Mengal bhi mojood the.

Mufahimati yaddasht ka maqsad Balochistan mein kam umri aur bachpan ki shadiyon ke khatime, bachiyon ke huqooq ke tahaffuz, khawateen ko baikhtiyar banane aur unhein bunyadi sahuliyat o mawaqe tak behtar rasai dene ke liye mushtarka koshishon ko mazboot banana hai. Is ke tahat donon idaron ke darmiyan khawateen aur bachiyon ke huqooq ke tahaffuz se mutaliq mukhtalif shobon mein taawun ko farogh diya jayega.

Sirf qanoon sazi kafi nahin: Kiran Baloch

Chairperson Kiran Baloch ne kaha ke kam umri ki shadi ek aham samaji masla hai jo bachiyon ki taleem, sehat, tahaffuz aur mustaqbil ke mawaqe par manfi asrat murattab kar sakta hai. Is se nipatne ke liye sirf qanoon sazi kafi nahin balke muashre mein agahi, walidain aur communities ki shamooliyat, idara jati taawun aur moasir policy iqdamat bhi zaroori hain.

Unhon ne kaha ke commission khawateen aur bachiyon ke huqooq ke tahaffuz, sinfi masawat ke farogh aur khawateen ko baikhtiyar banane ke liye apne aaini o qanooni mandate ke tahat moasir kirdar ada kar raha hai, aur Islamic Relief ke sath yeh yaddasht is maqsad ke husool mein aham taawun sabit ho sakti hai.

Kiran Baloch ne azm zahir kiya ke BCSW soobe mein khawateen aur bachiyon ko darpesh masail ke hal ke liye sarkari idaron, ghair sarkari tanzeemon, taraqqiyati sharakat daron aur civil society ke sath taawun mazeed barhaye ga, taake mushtarka koshishon se aisi hikmat-e-amli bane jo bachiyon ke huqooq ke tahaffuz, un ki taleem ke tasalsul aur khawateen ke liye bawaqar aur baikhtiyar zindagi ke mawaqe ko farogh de.

Tasveer: Bashukriya DG PR Balochistan