Kalat mein BEEF Scholarships aagahi session, Deputy Commissioner Engineer Ayesha Zehri ki sarbarahi

Kalat: Zila Kalat mein Balochistan Education Endowment Fund (BEEF) Scholarships ke hawale se aagahi session Deputy Commissioner Kalat Engineer Ayesha Zehri ki sarbarahi mein munaqid hua.

Yeh session Chief Minister Balochistan Mir Sarfraz Bugti ke khusoosi ehkamat par munaqid kiya gaya, jis mein mehkama Taleem Kalat o Khaliqabad ke afsaran, colleges ke principals, schoolon ke head masters o head mistresses aur talba o talibat ki badi tadad ne shirkat ki.

BEEF ki online Quetta team ne video link ke zariye Deputy Commissioner aur mehkama Taleem ke afsaran ko zila Kalat mein guzishta das saal ke dauran BEEF Scholarships se mustafeed hone wale talba ki tadad, district ke toppers aur Scholarships ki tafseelat par briefing di, jabke talba ko Scholarship ke miyar, darkhwast ke tareeqa-e-kaar, ehliyat aur aqliyati o khusoosi afrad ke liye mukhtas quota samet deegar umoor se aagah kiya.

Deputy Commissioner Ayesha Zehri ne kaha ke Taleem naujawan nasl ke roshan mustaqbil ki zamanat hai aur hukumat Balochistan mustahiq aurba-salahiyat talba ko aala Taleem ke liye har mumkin sahulat faraham kar rahi hai. BEEF Scholarship program ka maqsad mali mushkilat ke baais Taleem se mehroom ba-salahiyat talba ko taleemi mawaqe faraham karna hai.

Unhon ne talba se kaha ke woh Scholarships ke miyar aur tareeqa-e-kaar ko samajhte hue ba-waqt darkhwastein jama karayen, aur mehkama Taleem ke afsaran, asatiza aur taleemi idaron ke sarbarahan par zor diya ke talba mein bharpoor aagahi paida karen aur darkhwast ke amal mein rehnumai karen. Unhon ne kaha ke zila Kalat ke talba mein be-panah salahiyatein maujood hain jo taleemi mawaqe aur rehnumai milne par mulk o soobe ki taraqqi mein aham kirdar ada kar sakti hain.

Tasveer: Bashukriya DG PR Balochistan