Kalat mein Assistant Commissioner Asad Samalani ki Khuli Kachehri, load shedding, gas aur Zawa Dam ke masail uthaye gaye

Kalat: Hukumat-e-Balochistan ke ahkamat par zila intizamiya Kalat ki janib se Assistant Commissioner Asad Samalani ki zer-e-sadarat Khuli Kachehri munaqid hui, jis mein FC ke Colonel Naveed, Tehsildar Kalat Haji Abdul Ghaffar Lehri, DSP Mahiwal samet tamam mehkamon ke sarbarahan, ilaqa muazzizeen, siyasi o samaji rahnumaon aur sahafiyon ne shirkat ki.

Khuli Kachehri mein bijli ki taweel load shedding, shehr mein safai suthrai, Teaching Hospital mein sard khane ki tameer, gas ki adam faraahmi, Kalat mein private gas plant ki tansib, Zawa Dam ki tameer mein takheer, bazar mein tajawuzat, LPG ki qeematon mein izafa, poultry farm ki chaar deewari ki tameer aur Mughalzai mein water tank ki ghair faali samet deegar aham masail ujagar kiye gaye.

Assistant Commissioner Asad Samalani ne logon ke masail tawajjuh se sune aur unhein jald hal karne ki yaqeen dehani karate hue kaha ke Deputy Commissioner Engineer Ayesha Zehri ki sarbarahi mein ilaqe ke masail ke hal ke liye tamam tar wasail beroye kaar laye jayenge.

Tasveer: Bashukriya DG PR Balochistan