Kachhi Canal Phase One mukammal, RD 1183 se 1319 tak hissa Irrigation Balochistan ke hawale hoga; SE Mudassir Khosa ka daura
Naseerabad: Soobai wazir Irrigation Mir Muhammad Sadiq Umrani, soobai secretary abpashi Sohail ur Rehman Baloch aur chief engineer Canals Qurban Ali Jatoi ke ehkamat ki roshni mein superintending engineer Irrigation Circle Naseerabad Mudassir Zafar Khosa ne executive engineer Kachhi Canal Elahi Bakhsh Gajani ke hamrah Kachhi Canal Phase One ka tafseeli daura kiya.
WAPDA hukkam ke mutabiq Kachhi Canal Phase One ka project paya-e-takmeel ko pahunch chuka hai aur RD 1183 se RD 1319 tak canal ka hissa mahkama Irrigation Balochistan ke hawale kiya jana hai. Moainay ke dauran canal ke mukhtalif maqamat par nuqais ki nishandahi ki gayi, jis par mutaliqa hukkam ko marammati kaam fori aur miyari bunyadon par mukammal karne ki hidayat ki gayi.
WAPDA ke superintending engineer Waheed Hussain Sheikh ne project ke tameerati marahil aur pesh raft par briefing di.
Lakhon acre arazi ki sirabi
Mudassir Zafar Khosa ne kaha ke Kachhi Canal Phase One Balochistan ke pasmanda aur zarai ilaqon ke liye intehai aham project hai. Canal mein pani ki baqaida faraahmi se lakhon acre zarai arazi sirab karne mein madad milegi aur banjar o ghair abad zameenon ko qabil-e-kasht banane ke mauqe paida honge.
Unhon ne kaha ke mahkama Irrigation kisanon ke wasee tar mufad mein nehri nizam ki behtari aur pani ki munsifana faraahmi ke liye amali iqdamat kar raha hai. Phase One mein pani ki faraahmi se kashtkaron ki mushkilat ka izala hoga, ilaqe mein taraqqi o khushhali ke naye raaste khulenge aur tube wells aur deegar mehnge zarae abpashi par inhisar kam hoga.
Un ke mutabiq project se gandum, ganne, kapas, sabziyon aur deegar fasalon ki paidawar mein izafe ke imkanat roshan honge, jis se kashtkaron ki amdan barhe gi aur rozgar ke naye mauqe paida honge. Zarai sargarmiyon ke farogh se maqami mandiyon, karobar aur livestock ko bhi taqwiyat milegi, aur Kachhi Canal Balochistan mein zarai inqilab ki bunyad banne ke sath ghizai tahaffuz aur dehi maeeshat ke istehkam mein bhi aham kirdar ada kar sakti hai.
Tasveer: Bashukriya DGPR Balochistan
Mazeed parhen: Balochistan
Balochistan ki pehli digital media policy, tarqiyati maloomat tak awam ki rasai zaroori: Sarfraz Bugti
Dera Bugti: Chief Minister Sarfraz Bugti ki musalsal teesre roz Khuli Kachehri, masail ke fori hal ki hidayat
Balochistan Cabinet mein radobadal ka faisla Senate intakhabat tak mokhar
Turbat: Ghanah Mazari Kahan mein mutanaza arazi ke muamilat, Assistant Commissioner ka daura
Quetta Division: Commissioner Zeeshan Lashari ki sadarat mein Polio Task Force ka online jaiza ijlas
Rubaba Khan Bulaidi ki NAPA, BSCA aur NAVTTC hukkam se mulaqat, Naseerabad mein tarbiyat par ghaur
Chaman: District Education Officer ka Government Boys High School Mohalla Shehsawar ka achanak daura
Jafarabad: Deputy Commissioner Khalid Khan ki sadarat mein Aman o Aman ke teen ijlas
Usta Muhammad: Deputy Commissioner ki sadarat mein review ijlas, shikayat ke paidar hal ki hidayat
Naseerabad: 309 tube wellon ki solarization ka jaiza, transformer wapsi par notices ki hidayat
Usta Muhammad: District Education Group ke faislon par 26 ghair hazir ahalkar muattal, inquiry committee qayam
