Jamia Turbat ke sociology ke talba ka Kech Thalassemia Care Centre ka mutalaati daura

Turbat: University of Turbat ke BS sociology program ke chhathe semester ke talba ne faculty member Nooral Barkat ki sarbarahi mein Kech Thalassemia Care Centre (KTCC) Turbat ka mutalaati daura kiya, jis ka maqsad talba ko community health care ke amali nizam, taweel muddati mareezon ki nigahdasht ke samaji o nafsiyati pehluon aur thalassemia ki aagahi o rok tham se roshnas karana tha.

Centre ke bani o chairman Irshad Arif ne talba ko idare ke qayam, khidmaat, intizami o amali mushkilat, mareezon ki soorat-e-haal aur thalassemia ke moorosi phailao ki rok tham ke liye jaari iqdamaat par briefing di. Talba ne mareezon ke ward, sampling room aur tashkhisi laboratory ka daura kiya aur khoon ke namoone lene, screening, cross matching aur khoon se muntaqil hone wali bimariyon se mutaliq hifazati usoolon ka amali mushahida kiya.

University ke tarjuman ke mutabiq vice chancellor Professor Dr Gul Hasan ne sargarmi ko sarahte hue kaha ke university aur community ke darmiyan aise rawabit talba mein samaji shaoor aur awami sehat ke masail ko samajhne ki salahiyat paida karte hain, class room ke ilm ko amali tajurbe se jodte hain aur university ke strategic plan 2030 ke maqasid se hum aahang hain.

Tasveer: bashukriya DGPR Balochistan