Jafarabad: District Development Committee ka ijlas, BSDI Phase 3 ki tendering barwaqt mukammal karne ki hidayat

Jafarabad: Deputy Commissioner Jafarabad Khalid Khan ki zair-e-sadarat District Development Committee ka ijlas munaqid hua, jis mein jari aur mojawwaza taraqqiyati mansoobon ka jaiza liya gaya.

Ijlas mein Additional Deputy Commissioner Huzoor Bakhsh Bugti, Superintending Engineer Irrigation wa Executive Engineer Irrigation Drainage Mudassir Zafar Khosa, Executive Engineer Public Health Engineering Muhammad Kazim Looni, Executive Engineer Communication wa Tameerat (Buildings) Irfan Ali samet mutalliqa mahkamon ke afsaran ne shirkat ki.

Deputy Commissioner Khalid Khan ne tamam mutalliqa afsaran ko hidayat ki ke Balochistan Special Development Initiative (BSDI) Phase 3 ki tamam schemon ki tendering ka amal muqarrara muddat mein mukammal kar ke mansoobon par barwaqt amalderamad yaqeeni banaya jaye.

Unhon ne kaha ke hukumat awam ke wasee tar mufad mein taraqqiyati mansoobon ko tarjihi buniyadon par mukammal karne ke liye amali iqdamat kar rahi hai, lihaza tamam mahkame bahmi taawun aur zimmedari ka muzahira karte hue mansoobon ki barwaqt takmeel yaqeeni banayen taake awam ko un ke samrat jald az jald hasil ho saken.

Tasveer: Bashukriya DGPR Balochistan