Jafarabad: Deputy Commissioner Khalid Khan ki zer-e-sadarat DCC, DICC aur DIC ke ijlas

Jafarabad: Deputy Commissioner Jafarabad Khalid Khan ki zer-e-sadarat teen aham ijlas munaqid hue jin mein District Coordination Committee (DCC), District Intelligence Coordination Committee (DICC) aur District Implementation Committee (DIC) ke ijlas shamil the.

DIC ke ijlas mein deeni madaris ki registration, ghair qanooni labour, security surat-e-haal, Irani tel ki smuggling, manshiyat, ghair qanooni naql o hamal aur zila mein ghair qanooni tor par muqeem ghair mulkiyon se mutaliq umoor ka jaiza le kar zaroori faislay kiye gaye. DICC ke ijlas mein railway track, bus adda, National Highway aur hassas maqamat ki security, Aman o Aman ko darpesh khatrat, threat mapping aur profiling par ghaur hua, jabke DCC ijlas mein sarkari umoor aur mehkmon ki karkardagi samet intizami muamlat ka jaiza liya gaya.

Deputy Commissioner Khalid Khan ne kaha ke Aman o Aman ka qayam, awam ke jaan o maal ka tahaffuz aur qanoon ki amaldari zilai intizamiya ki awwalin tarjihat hain. Unhon ne hidayat ki ke idare bahami rabte se zimmedariyan anjam dein, hassas maqamat ki security mazeed moassir banai jaye aur smuggling, manshiyat, ghair qanooni naql o hamal aur qanoon shikan anasir ke khilaf bila imtiaz karrawai ki jaye, jabke ghair qanooni sargarmiyon mein mulawwis sarkari mulazimin ya deegar afrad ke khilaf qanoon ke mutabiq sakht iqdamat kiye jayen.

Tasveer: Bashukriya DGPR Balochistan