IG Police Balochistan Muhammad Tahir ka naye DSPs se khitab: jadeed policing se shehriyon ko fori relief

Quetta: Inspector General of Police Balochistan Muhammad Tahir ne kaha hai ke jadeed policing par amal-daramad ke zariye aam shehriyon ko fori relief faraham kiya ja sakta hai, aur police ke musbat tashakhkhus ko mazboot bana kar awam mein ehsas-e-tahaffuz ki fiza ko mazeed behtar kiya jaye.

Woh Central Police Office mein Balochistan Public Service Commission se barah-e-raast taqarrur hone wale naye Deputy Superintendents of Police ke taarufi ijlas se khitab kar rahe the.

IG Police ne kaha ke matehat amle se behtar karkardagi lena supervisory afsaran ki zimmedari hai. Unhon ne hidayat ki ke afsaran apna commanding kirdar mazeed muassir andaz mein ada karenge to aam shehri ko ba-waqt insaf milega aur un ki shikayat ka izala bhi mumkin ho sakega.

Unhon ne kaha ke smart aur community policing ki guidelines ke mutabiq shehriyon ko miari khidmat ki faraahmi aur jaraim ke khatme ke liye tamam dastiyab wasail baroye kaar laye jayein taake awam ka police par aitmaad mazeed mazboot ho. Un ka kehna tha ke police ke faraiz mein di gayi zimmedariyon par ba-waqt karwai se hi jaraim ki rok tham mumkin hai.

Ijlas mein shareek afsaran ne shehriyon ki khidmat, un ke jaan o maal ke tahaffuz aur qanoon ki baaladasti ko har surat yaqeeni banane ke azm ka aada kiya. Is moqe par DIG Headquarters Hassan Asad Alvi, DIG Quetta Imran Shaukat aur deegar afsaran bhi mojood the.

Tasveer: bashukriya DGPR Balochistan