Hub mein shadeed abi bohran: Deputy Commissioner ka ijlas, Hub Dam se 30 feesad se bhi kam pani milne par tashweesh

Hub: Sanati zila Hub mein jari shadeed abi bohran par Deputy Commissioner Hub ki zer-e-sadarat ijlas munaqid hua, jis mein FC 147 Wing ke commander Colonel Shahzad Qamar, Chamber of Commerce ke sadr Ismail Sattar o digar sanatkar, Anjuman-e-Zamindaran ke numainde, Assistant Commissioner Hub Mahim Khan Gichki, chairman Municipal Corporation Gul Hasan, vice chairman Azeem Siyan aur mehkama police o Agriculture Department ke afsaran shareek hue.

Deputy Commissioner ne shurka ko bataya ke arbon rupay wafaq ko tax dene wala Hub shehr guzishta kai dinon se pani se mehroom hai aur sanati idare, shehri abadi aur zamindar abi bohran se mutasir hain. Hub Dam pani se bhara hua hai lekin Dam hukkam ki jaanib se zaruriyat ke mutabiq pani faraham nahin kiya ja raha.

Unhon ne kaha ke jab Hub Dam 1980 ki dahai mein qaim kiya gaya tha to us waqt Hub ki abadi taqriban 20 hazar nufoos par mushtamil thi, jabke aaj yeh barh kar taqriban 6 lakh tak pahunch chuki hai. Abadi mein ghair mamooli izafe ke sath Hub mein taqriban 300 sanati units qaim ho chuke hain, jabke Sakran samet mulhiqa ilaqon mein wasee zarai arazi bhi maujood hai, aur mojooda halaat mein shehri abadi, sanat aur Zaraat teenon shobe pani ki shadeed qillat se mutasir ho rahe hain.

Sanatein band hone ka khadsha

Sadr Chamber of Commerce Ismail Sattar ne kaha ke sanati zaruriyat ke mutabiq pani ki adam tarseel se industrial sector aur rozgar mutasir ho raha hai, chief secretary aur Corps Headquarter ko surat-e-haal se agah kiya gaya hai, aur Balochistan mein logon ko rozgar dene wali sanatein band ho rahi hain. Unhon ne kaha ke sahili patti ka pani khara hone ki wajah se sanatein Hub canal par inhisar karti hain, irrigation hukkam ki jaanib se Hub Dam project director ko bar-ha muraasla likha gaya hai, aur wafaqi hukumat aur WAPDA hukkam ko sanjeedgi se pani bohran ka hal talash karna hoga.

Ijlas mein Hub Dam se pani ki faraahmi, mojooda share, sanati o zarai shobe ko darpesh mushkilat aur pani chori ki roak tham o ziya samet mukhtalif umoor par mushawarat ki gayi. Shurka ko bataya gaya ke Hub zila ko is waqt us ke mutawaqqa pani ke hisse ka 30 feesad se bhi kam pani mausool ho raha hai, halanke Hub Dam ka catchment area Balochistan mein waqe hai. Yeh surat-e-haal tashweeshnak hai kyunke taqriban teen maah qabl tak Hub mein pani ki aisi shadeed qillat maujood nahin thi, taham achanak pani ke hisse mein numayan kami waqe hui hai jis ki wujuhat ka jamey jaiza lena zaroori hai.

Deputy Commissioner Hub ne kaha ke pani Hub ki baqa ka masla hai aur ise sirf ek intizami ya takneeki mamla samajh kar nazar andaz nahin kiya ja sakta. Shehri abadi ke liye peene ka pani, sanati shobe ke liye zaroori pani aur kisanon ke liye zarai pani ki faraahmi yaqeeni banana waqt ki aham zaroorat hai. Unhon ne khabardar kiya ke mojooda abi bohran barqarar raha to is ke manfi asraat na sirf shehri zindagi, sanat aur Zaraat par murattab honge balke Aman o Aman ki surat-e-haal bhi mutasir hone ka khadsha hai, is liye tamam mutaliqa idaron ko bahami taawun se fori aur thos iqdamat karna honge.

Hub Dam project director ki briefing

Project director Hub Dam ne pani ke share par briefing dete hue bataya ke Karachi aur Hub ke liye pani ki taqseem ka ek baqaida aur notified tareeqa kar maujood hai jis ke tahat dono ilaqon ke hisse ka taayyun kiya jata hai, taqseem muqarrara qawaid o zawabit ke tahat hoti hai aur koi fard ya idara apni marzi se is nizam ko tabdeel nahin kar sakta. Unhon ne kaha ke pani ki taqseem ke sath sath pani chori, ghair qanooni istemal, ziya aur tarseeli nizam mein hone wale nuqsanat samet tamam awamil ka jaiza lena zaroori hai aur mustaqil hal ke liye tamam mutaliqa idaron ko mil kar thos aur qabil-e-amal hikmat-e-amli wazah karna hogi. Unhon ne is taasur ki bhi tardeed ki ke Balochistan ke hisse ka pani jaan boojh kar kam kiya ja raha hai.

Sadr Anjuman-e-Zamindaran Hub Rafiq Siyapad ne kaha ke pani ki kami ke baais Sakran aur mulhiqa ilaqon ke kisan shadeed mutasir ho rahe hain aur faslon ki paidawar khatre mein hai. Unhon ne zarai zameenon ke liye pani ki munsifana aur barwaqt faraahmi ka mutalba kiya.

Shurka ne ittefaq kiya ke barhti hui abadi, sanati sargarmiyon aur zarai zaruriyat ke paish-e-nazar pani ki mojooda qillat sangeen bohran ban chuki hai. Deputy Commissioner ne mutaliqa mehkamon ko hidayat ki ke pani ki dastiyabi, taqseem, tarseel, chori, ziya aur mojooda share samet tamam pehluon ka jamey jaiza le kar aadad o shumar aur zameeni haqaiq ki bunyad par thos sifarishat murattab ki jayen, aur wazah kiya ke zilai intizamia Hub ki shehri abadi, sanati shobe aur zarai maeeshat ke tahaffuz ke liye har mumkin forum par awaz uthaye gi.

Ijlas ke ikhtitam par azm kiya gaya ke bain-ul-idara jati taawun, shaffaf nizam-e-taqseem, pani ke ziya aur chori ki roak tham aur tamam stakeholders ki mushawarat se ek jamey aur paidar hikmat-e-amli wazah ki jaye gi taake shehri abadi ko peene ka pani, sanati sargarmiyon ka tasalsul aur Sakran samet digar ilaqon mein zarai maeeshat ka tahaffuz yaqeeni banaya ja sake.

Tasveer: Bashukriya DGPR Balochistan