Hub mein electric inspector Siraj Ahmed Samalani ki Khuli Kachehri, K-Electric consumers ki shikayat sunin

Hub: Daftar electric inspector, Mehkama-e-tawanai Balochistan, Hub ke zer-e-ehtimam K-Electric ke consumers ko darpesh bijli se mutaliq masail aur shikayat ke fori izale ke liye 2 October 2026 ko Khuli Kachehri munaqid ki gayi, jis ki sadarat electric inspector Mehkama-e-tawanai Balochistan engineer Siraj Ahmed Samalani ne ki.

Khuli Kachehri ka maqsad zila Hub ke K-Electric consumers ko bijli ki farahmi, zaid billing, ghalat meter reading, bijli ke bilon mein be-zabitagiyon, technical kharabiyon aur deegar mutaliqa masail ke hal ke liye barah-e-raast aur moasir platform farahem karna tha, jahan consumers ne apni shikayat aur masail mutaliqa hukkam ke samne pesh kiye.

Electric inspector engineer Siraj Ahmed Samalani ne consumers ki shikayat ka tafseeli jaiza liya aur un ke sath maujood dastavizi saboot, bil-khusus bijli ke bil, sabiqa darkhwaston o shikayat ki naqool aur deegar zaroori dastavezat ki janch partal ki. Unhon ne mutaliqa hukkam ko shikayat ke fori izale aur consumers ko relief ki farahmi ke liye zaroori ehkamat bhi jari kiye.

Consumers ko yaqeen dahani karayi gayi ke jaiz shikayat ke izale ke liye muqarrara qawaid o zawabit ke mutabiq har mumkin iqdamat kiye jayenge.

Tasveer: Bashukriya DGPR Balochistan