Hub: Commissioner Lasbela Saira Ata ka Insidad-e-Smuggling ijlas, diesel aur Indian chhaliya ki smuggling par zero tolerance

Hub: Commissioner Lasbela Division Saira Ata ki zer-e-sadarat zila Hub aur Lasbela mein Aman o Aman aur insidad-e-smuggling ke hawale se aham ijlas LEDA conference room mein munaqid hua, jis mein Additional Deputy Commissioner Siraj Karim Baloch, Assistant Commissioner Hub Mahim Baloch, SP Hub Mirza Bilal Hasan, FC 147 Wing ke Major Yahya, hassas idaron, mahkama Excise and Taxation aur ANF ke officers shareek hue.

Ijlas mein Aman o Aman ki surat-e-haal aur Sindh Balochistan sarhadi patti par Indian chhaliya aur non-custom ashya ki smuggling ke routes ke khilaf zero tolerance policy ke tahat jame manson par kaam ka faisla kiya gaya. RCD Highway aur Coastal Highway par musafir bason ke zariye diesel aur non-custom paid ashya ki ghair qanooni smuggling rokne, check posts ki karkardagi behtar banane aur technical surveillance ke zariye shahraahon ko mehfooz banane ka bhi faisla hua.

SP Hub, FC 147 Wing ke Major Yahya, Pakistan Coast Guard ke officer, Director Excise Sohail Ahmed aur dusre idaron ke hukkam ne insidad-e-mansoobat o insidad-e-smuggling ke hawale se apni karkardagi par briefing di, jabke customs ke officers ijlas se ghair hazir rahe. Ijlas mein zilai intizamia ke matehat tamam idaron ke darmiyan moassar coordination mechanism aur muqami community ki moawanat se security SOPs par amal-daraamad par bhi mushawarat ki gayi.

Log check posts ke amle ko muhafiz samjhein: Commissioner

Commissioner Saira Ata ne kaha ke smuggling ki rok tham aur snap checking ke liye jadeed Technology ke istemal ki tarbiyat aur wasail barue kaar lane ki zarurat hai. Check posts par taina’t amla aisa rawaiya apnaye ke log unhein dushman nahin muhafiz samjhein, aur qanoon nafiz karne wale idare apne rawaiyon se riyasat ka musbat image pesh karein. Unhon ne kaha ke aisa mechanism banaya jaye ke public transport ko baar baar check na karna pade aur security idaron ko digitalization ki janib barhna hoga.

Commissioner ne kaha ke water tankers se rishwat le kar unhein Karachi paar karwane ki shikayat par mutaliqa zimmedaran se baz-purs ki jayegi. Ijlas mein National Action Plan ke security mechanism ke tahat kaam karne wale idaron ke darmiyan rabta munazzam aur wasee karne par ghaur kiya gaya, jabke Commissioner ne Gadani Customs Collectorate ke officers ki ghair hazri par mujaz authority ko khat likhne ke ahkamat jari kiye.

Tasveer: Bashukriya DGPR Balochistan