Gwadar Youth Tourism Summit 2026: Siyahat ke farogh aur nawjawanon ki shamooliyat par zor

Gwadar: Directorate of Tourism, hukumat-e-Balochistan ke zere-ehtimam Gwadar Youth Tourism Summit 2026 ka inaqad kiya gaya. Is mein Balochistan mein siyahat ke farogh, nawjawanon ki salahiyaton ko ujagar karne, digital media ke mawassar istemal aur maqami maeeshat ko mazboot banane par zor diya gaya.

Taqreeb se Director Tourism Balochistan Gehram Bakhshi, Registrar University of Gwadar Daulat Khan, Gwadar Press Club ke sadr Noor Mohsin aur RCDC ke sadr Haji Abdul Ghani Nawazish ne khitab kiya.

Muqarrireen ne kaha ke Gwadar apne dilkash sahilon, munfarid saqafat, samandri wirse, maqami rawayaat aur mehman nawazi ke baais siyahat ke shobe mein ghair mamooli salahiyat rakhta hai. Zarurat is amr ki hai ke in qudrati aur saqafati wasail ko mawassar andaz mein mutaarif karaya jaye aur nawjawanon ko siyahat ke farogh ke liye dastiyab mawaqe se bharpoor istifade ki targheeb di jaye.

Panel Discussion

Summit ke dauran panel discussion mein siyahat, e-commerce aur karobari shobon se wabasta mahireen ne shirkat ki aur siyahat ke farogh ke imkanat, darpesh challenges aur mustaqbil ki hikmat-e-amli par izhar-e-khayal kiya. Panel mein e-commerce expert aur University of Gwadar ke PCTVI ke shobe e-commerce ki faculty member Murtasim Iqbal, tourism specialist Zulekha Tariq, entrepreneur Zohra Khalil aur tourism specialist Ayesha Murad Bakhsh shareek thin. Graan Naz Hoth ne panel discussion ki mezbani aur nizamat ke fraiz anjam diye.

Panel discussion mein is amr par roshni dali gayi ke jadeed digital technology, social media, photography aur video mawad ke zariye Gwadar ke sahili maqamat, qudrati manazir, tareekhi wirse aur saqafati rawayaat ko qaumi aur International satah par mawassar andaz mein mutaarif karaya ja sakta hai.

Mahireen ne zor diya ke nawjawan digital platforms aur e-commerce ke zariye siyahat se mutaliq karobari sargarmiyon ko farogh dene, maqami masnuaat ki tashheer aur sayyahon ko Gwadar ki jaanib raghib karne mein aham kirdar ada kar sakte hain.

Challenges aur hikmat-e-amli

Mubahise mein siyahat ke shobe ko darpesh challenges, bil-khusus security, sayyahon ke tahaffuz, bunyadi sahuliyat ki faraahmi aur siyahati maqamat ki mawassar tashheer par bhi guftagu ki gayi. Shurka ne is baat ki ahmiyat ujagar ki ke siyahat ke payedar farogh ke liye hukumat, mutaliqa idaron, nijee shobe aur maqami community ko mushtarka hikmat-e-amli ke tehat kaam karna hoga.

Muqarrireen aur panelists ne kaha ke siyahat ke shobe ke liye munasib wasail mukhtas karne, mawassar hifazati intizamat yaqeeni banane, nawjawanon ki pesha warana tarbiyat aur maqami karobari afraad ki hausla afzai se Gwadar mein siyahati sargarmiyon ko wusat di ja sakti hai. Is se na sirf maqami nawjawanon ke liye rozgar aur Karobar ke naye mawaqe paida honge balke ilaqe ki maeeshati taraqqi mein bhi numayan madad milegi.

Summit mein is baat ko ujagar kiya gaya ke Gwadar mahaz ek sahili shehar nahin balke apni samandri tareekh, saqafati shanakht aur qudrati husn ke baais Pakistan ke aham siyahati marakiz mein shamil hone ki bharpoor salahiyat rakhta hai. Nawjawanon ki faal shamooliyat, jadeed digital zaraye ke istemal aur mushtarka koshishon ke zariye Gwadar ko mulki aur aalami satah par aik numayan siyahati maqam ke taur par mutaarif karaya ja sakta hai.

Tasveer: Bashukriya DGPR Balochistan