Gwadar mein zameenon ke settlement ke liye khusoosi task force, mukammal record ek hafte mein zilai intezamia ke hawale karne ka hukm

Gwadar: Commissioner Makuran Division Dr Tufail Ahmed Baloch ki zer-e-sadarat settlement ke hawale se aham ijlas munaqid hua, jis mein zila Gwadar ke mukhtalif mawazaat ki zameenon ke settlement, record ki takmeel aur zilai intezamia ko record ki muntaqili se mutaliq ahkamat jari kiye gaye.

Ijlas mein settlement record aur zer-e-takmeel umoor par Commissioner Makuran ko tafseeli briefing di gayi. Bataya gaya ke mukhtalif mawazaat ki zameenon ke record ki takmeel ka amal jari hai, jise muqarrara muddat mein mukammal karne ke liye murabbat iqdamat kiye ja rahe hain. Commissioner Makuran ne mawazaat mein jari settlement ka amal jald az jald mukammal karne ke ahkamat jari kiye.

Khusoosi task force aur ek hafte ki muhlat

Commissioner Makuran ne bataya ke zila Gwadar mein zameenon ke settlement ki barwaqt takmeel ke liye ek khusoosi task force tashkeel di ja rahi hai, jo kaam ki pesh raft ki musalsal nigrani karegi aur zer-e-iltawa umoor ko tarjihi buniyadon par nimtaegi.

Unhon ne hidayat ki ke jin mawazaat ka settlement mukammal ho chuka hai, un ka record aainda ek hafte ke andar zilai intezamia ke hawale kiya jaye, taake zameenon ke record ko baqaida taur par mehfooz aur mutaliqa mehkame ke record ka hissa banaya ja sake.

Commissioner Makuran ne kaha ke jahan izafi staff ki zaroorat ho wahan zaroorat ke mutabiq staff faraham kiya jayega, taake zameenon ka record jald az jald mukammal, durust aur qabil-e-aitmad banaya ja sake. Unhon ne wazeh kiya ke settlement ke amal mein darpesh intezami ya digar umoor ke hal ke liye Commissioner office har mumkin muawinat faraham karega.

Unhon ne officers ko hidayat ki ke muqarrara ahdaf ke hasool, record ki durustgi aur barwaqt muntaqili ko yaqeeni banate hue tamam umoor tarjihi buniyadon par mukammal kiye jayen. Commissioner Makuran ne tanbeeh ki ke jis staff ne settlement ke amal mein taawun nahin kiya ya susti dikhai, us ke khilaf qanoon ke mutabiq karwai ki jayegi aur use service se dismiss kiya jayega.

Ijlas mein Deputy Commissioner Gwadar Naqeebullah Kakar, Settlement Officer Makuran Division Zahid Lango, Additional Deputy Commissioner (Revenue) Gwadar Zahoor Baloch, Additional Deputy Commissioner (General) Gwadar Dr Abdul Shakoor, Tehsildar Settlement Gwadar Akbar Baloch samet Revenue Department o Settlement ke digar officers aur staff ne shirkat ki.

Tasveer: Bashukriya DGPR Balochistan