Gwadar mein PPHI ka mahana jaiza ijlas, bunyadi marakiz-e-sehat ki karkardagi aur adviyat ki dastiyabi ka jaiza

Gwadar: Zilai officer sehat Dr Yasir Tahir aur PPHI ke District Manager Dr Munir Ahmed Baloch ki zer-e-sadarat PPHI ka mahana jaiza ijlas munaqid hua, jis mein tamam bunyadi marakiz-e-sehat ke incharges ne shirkat ki.

Ijlas mein zilai Gwadar ke bunyadi marakiz-e-sehat ki karkardagi, tibbi sahuliyat, adviyat ki dastiyabi, staff ki hazri aur awam ko di jane wali sehat ki khidmat ka tafseeli jaiza liya gaya. Mahana karkardagi report ka jaiza lete hue sehat-e-amma ki sahuliyat ko mazeed muassir banane aur bil-khusus door daraz aur pasmanda ilaqon ke awam ko barwaqt aur miyari tibbi sahuliyat ki faraahmi yaqeeni banane par zor diya gaya.

Ijlas mein hidayat ki gayi ke bunyadi marakiz-e-sehat mein tibbi amle ki hazri, adviyat ki dastiyabi aur mareezon ko zaroori tibbi khidmat ki faraahmi mein kisi qism ki ghaflat bardasht nahin ki jaye gi, aur marakiz-e-sehat ki karkardagi ko musalsal monitor kiya jaye.

Dr Yasir Tahir ne kaha ke hukumat Balochistan ki sehat-e-amma ki policy ke tahat shehriyon ko un ki dehleez par bunyadi aur miyari sehat ki sahuliyat ki faraahmi awwaleen tarjeeh hai. Unhon ne mutalliqa hukkam par zor diya ke door daraz ilaqon mein sehat ki sahuliyat ki dastiyabi, muassir nigrani aur awami shikayat ka barwaqt izala yaqeeni banaya jaye.

Ijlas mein PPHI ke tahat sehat-e-amma ki khidmat mein mazeed behtari, bunyadi marakiz-e-sehat ki karkardagi barhane aur awam ko behtar tibbi sahuliyat ki faraahmi ke liye mukhtalif iqdamat par bhi ghaur kiya gaya.

Tasveer: Bashukriya DG PR Balochistan