Gwadar mein Mir Kalmati Inter Educational Sports Festival 2026 ka rang-a-rang iftitah, talba ke tableau aur Football match

Gwadar: Naujawan nasl ki salahiyaton ko nikharne, khelon ke farogh aur taleemi idaron ke darmiyan sehat mand aur musbat musabqat ka mahaul parwan charhane ke liye Mir Kalmati Inter Educational Sports Festival Gwadar 2026 ka baqayda aur shandar iftitah kar diya gaya. Festival ka iftitah Director Educational Schools Munir Ahmed Nodezai ne kiya.

Mir Kalmati Inter Educational Sports Festival Gwadar ke zer-e-ehtimam hone wale is festival ko mehkama Taleem Gwadar, Private Schools Association Gwadar, Idara Taraqiyat Gwadar aur deegar mutalliqa idaron ka bharpoor taawun hasil hai. Iftitahi taqreeb mein festival ke chairman Mir Arshad Kalmati samet mukhtalif sarkari o nijji taleemi idaron ke talba, asatiza aur taleemi afsaran ne badi tadad mein shirkat ki.

Talba ne rang-a-rang saqafati o taleemi tableau, parade, march past, rassa kashi ke muqablon aur school scouting ke khusoosi muzahire se taqreeb ko yadgar bana diya. Is moqe par Gowsari High School aur New Town Grammar High School ke darmiyan sansani khez Football match bhi khela gaya, jis mein donon teamon ke naujawan khilariyon ne shandar khel pesh kar ke shaiqeen se bharpoor daad wusool ki. Match mein commentary ke faraiz Ghaffar Rehman aur Ihsam Qazi ne anjam diye.

Naujawanon ko musbat sargarmiyon ki taraf lana maqsad

Iftitahi taqreeb se khitab karte hue Munir Ahmed Nodezai aur Mir Arshad Kalmati ne kaha ke festival ka maqsad mehaz khelon ke muqable karana nahin balke Gwadar ki naujawan nasl, khusoosan Generation Z (Gen-Z) ko musbat, sehat mand aur tameeri sargarmiyon ki janib raghib karna hai. Unhon ne kaha ke school ki sath par khelon ka mazboot culture farogh de kar naujawanon ko apni salahiyaton ke izhar aur qaumi o International sath par mulk o suba ka naam roshan karne ke mawaqe diye ja rahe hain.

Un ka kehna tha ke Gwadar aur Makuran ke khelon ke maidanon ne mazi mein bhi basalahiyat aur namwar khilari paida kiye jinhon ne qaumi sath par apni salahiyaton ka loha manwaya, aur mojooda taleemi o sports policy ka bunyadi maqsad isi talent ko barwaqt nikhar kar naujawanon ko mulk o qaum ka qeemti asasa banana hai.

Tasweer: Bashukriya DGPR Balochistan