Gwadar: DHO Dr Yasir Tahir ka BHU Fakirabad aur Civil Dispensary Har Bailar ka daura, adviyat faraham

Gwadar: Chief Minister Balochistan Mir Sarfraz Bugti ke vision ke tahat soobe ke door daraz ilaqon mein awam ko miyari, barwaqt aur moosiar tibbi sahuliyat ki faraahmi ke liye hukumat Balochistan amali iqdamat kar rahi hai. Isi silsile mein District Health Officer Gwadar Dr Yasir Tahir ne Deputy District Health Officer Dr Farooq Baloch ke hamrah Bunyadi Markaz-e-Sehat (BHU) Fakirabad aur Civil Dispensary Har Bailar ka tafseeli daura kiya.

Daure ke dauran District Health Officer ne tibbi amle ki hazri, adviyat ke dastiyab zakhire, mareezon ko faraham ki jane wali tibbi sahuliyat aur majmooi intizami umoor ka jaiza liya. Unhon ne donon marakiz-e-Sehat mein zaroori adviyat ki dastiyabi yaqeeni banane ke liye mazeed adviyat bhi faraham keen aur amle ko hidayat ki ke awam ko miyari aur barwaqt tibbi khidmat ki faraahmi mein kisi qism ki kotahi bardasht nahin ki jaye gi.

Dr Yasir Tahir ne tauseei program bara-e-Hifazati Teeka Jat (EPI) ke markaz ka bhi moayna kiya, jahan bachon ki vaccination ke record, cold chain system aur field mein Hifazati Teeka Jat ki coverage ka jaiza liya gaya. Unhon ne hidayat ki ke har bachche tak Hifazati Teeka Jat ki barwaqt rasai yaqeeni banai jaye aur mamool ki vaccination muhim ko mazeed moosiar aur faal banaya jaye taake bachon ko qabil-e-insidad bimariyon se mehfooz rakha ja sake.

Is moqe par unhon ne kaha ke Chief Minister Mir Sarfraz Bugti ki qiyadat mein hukumat Balochistan shobah-e-Sehat ki behtari, bunyadi marakiz-e-Sehat ki faaliyat, adviyat ki bila-tatal faraahmi, Hifazati Teeka Jat ke nizam ko mazeed moosiar banane aur awam ko un ki dehleez par miyari tibbi sahuliyat faraham karne ke liye bharpoor iqdamat kar rahi hai. Unhon ne azm zahir kiya ke zila Gwadar ke tamam Sehat marakiz ki baqaida nigrani, shaffaf monitoring aur awami khidmat ke miyar ko behtar banane ka amal jari rakha jaye ga.

Tasveer: bashukriya DG PR Balochistan