Gwadar: Deputy Commissioner Naqeebullah Kakar ki NGOs ko maqami afraad ko rozgar mein tarjeeh dene ki hidayat

Gwadar: Deputy Commissioner Gwadar Naqeebullah Kakar ki zer-e-sadarat zila Gwadar mein kaam karne wali ghair sarkari tanzeemon (NGOs) ke numainda gaan ka taarufi ijlas Deputy Commissioner Office Gwadar mein munaqid hua, jis mein Additional Deputy Commissioner (General) Dr Abdul Shakoor samet mukhtalif NGOs aur mutaliqa idaron ke numainda gaan ne shirkat ki.

Ijlas mein zila Gwadar mein NGOs ki jaari sargarmiyon, mansoobon, registration, rozgar ke mawaqe, maali shaffafiyat, maqami abadi ko faraham ki jane wali sahuliyat aur zila intizamiya ke sath mouassar rabita kari ka jaiza liya gaya.

Deputy Commissioner Naqeebullah Kakar ne kaha ke Gwadar mein kaam karne wali NGOs ki bunyadi zimmedari maqami abadi ki falah o behbood aur ilaqe ki paidar taraqqi mein mouassar kirdar ada karna hai. Zila intizamiya haqiqi aur musbat sargarmiyon ke zariye awam ko faida pohanchane wali tanzeemon ki hausla afzai karegi, taham tamam idaron ke liye shaffafiyat, jawabdehi aur qawaid o zawabit ki pabandi zaroori hai.

Maqami nojawanon ko rozgar mein tarjeeh

Unhon ne hidayat ki ke NGOs mein maqami afraad ko rozgar mein tarjeeh di jaye, bil-khusus nichle darje aur ghair technical asamiyon par maqami nojawanon ki bharti yaqeeni banai jaye. Technical aur khusoosi noiyat ki asamiyon ke liye matlooba qabliyat rakhne wala maqami umeedwar dastiyab na hone ki soorat mein dusre ilaqon se mahir afraad ki khidmat hasil ki ja sakti hain.

Deputy Commissioner ne kaha ke zila Gwadar mein 70 se zaid NGOs registered ya faal hain, taham ijlas mein mehdood tadad mein numainda gaan ne shirkat ki. Unhon ne ghair hazir tanzeemon ko hidayat ki ke woh teen roz ke andar Deputy Commissioner Office se rabita kar ke apni sargarmiyon, registration aur dusre zaroori kawaif pesh karen, basurat-e-deegar qawaid o zawabit ke tahat karrawai amal mein layi jayegi.

Unhon ne kaha ke NGOs ki karkardagi ka miyar sirf naam ya daawon se nahin balke zameeni satah par awam ko pohanchne wale haqiqi fawaid se mutayyan hoga, aur aise mansoobon ki hausla afzai ki jayegi jin ke nataij qabil-e-paimaish hon aur jin se maqami abadi ko derpa faida hasil ho. NGOs ko apni khali asamiyon, tanzeemi mandate, registration, daftar, jaari o mukammal mansoobon, budget, funding zaraye, donors, audit, bank accounts, mansoobon ke asraat aur paidari samet dusri malumat zila intizamiya ke sath share karne ki hidayat bhi ki gayi.

Deputy Commissioner ne NGOs ki fanni o peshawarana tarbiyat ke miyar aur ifadiyat par zor dete hue kaha ke nojawanon ko aisi tarbiyat di jaye jo unhein amli taur par rozgar ya khud rozgari ke qabil banaye. Unhon ne bataya ke BRSP ke tahat Gwadar ki 30 maqami khawateen ko beautician course ke liye Islamabad bheja gaya hai, jabke maqami nojawanon, bil-khusus ladkon ko solar Technology samet dusre fanni shobon mein tarbiyat ke mawaqe faraham karne ke liye bhi iqdamat kiye ja rahe hain.

Unhon ne kaha ke NGOs zila intizamiya aur mutaliqa sarkari mehkamon ke sath mouassar rabita kari yaqeeni banayen, aur NOC ke ijra ya tajdeed ke liye tamam qanooni o intizami taqazon ki takmeel aur zila intizamiya se rabita zaroori hoga. Ijlas ke ikhtitam par Deputy Commissioner ne kaha ke zila intizamiya shaffaf, awam dost aur nateeja khez falahi sargarmiyon ko farogh dene wali NGOs ke sath bharpoor taawun jaari rakhegi, taham tamam tanzeemon ko maqami rozgar, maali shaffafiyat, mouassar rabita kari aur awami mufad par mabni mansoobon ko apni tarjeehat mein sarfehrist rakhna hoga.

Tasveer: bashukriya DGPR Balochistan