Gwadar: DEO Zaraton Baloch ka Pasni aur Ormara ke girls schoolon ka daura, talibat khule aasman tale zer-e-taleem

Gwadar: Chief Minister Balochistan Mir Sarfraz Bugti ke vision ke tahat suba ke har bachche, bil-khusus talibat, ko miyari, mehfooz aur sazgar taleemi mahaul ki faraahmi ke liye hukumat-e-Balochistan amali iqdamat jari rakhe hue hai. Isi silsile mein District Education Officer (khawateen) Gwadar Zaraton Baloch ne tehsil Pasni aur tehsil Ormara ke mukhtalif sarkari taleemi idaron ka daura kar ke tadreesi, intizami aur bunyadi sahuliyat ka jaiza liya.

Daure ke dauran Government Girls High School Kalmat mein asatiza, school intizamia aur union council ke chairman ke hamrah ijlas munaqid kiya gaya jis mein peene ke saaf pani ki shadeed qillat aur school mein hifazati boundary wall ki adam mojoodgi ko aham masail qarar diya gaya. DEO ne mutalliqa hukkam ko hidayat ki ke in masail ki fori nishandehi karte hue qabil-e-amal tajaweez murattab ki jayen taake unhein tarjihi buniyadon par hal kiya ja sake.

Baad azan Government Girls Middle School Panjgur, Ormara ka muaina kiya gaya, jahan haal hi mein tameer hone wale do naye classrooms mein darwazon aur khidkiyon ki tansib na hone ke bais tadreesi sargarmiyon mein mushkilat ka jaiza liya gaya. Unhon ne hidayat ki ke tameerati kaam jald mukammal kar ke classrooms ko tadrees ke qabil banaya jaye.

Government Girls Middle School Koh-e-Bin, Ormara ke daure ke dauran maloom hua ke classrooms ki shadeed kami ke bais talibat khule aasman tale aur farsh par baith kar taleem hasil karne par majboor hain. DEO ne surat-e-haal par tashweesh ka izhar karte hue naye kamron ki tameer tak talibat ke liye fori taur par arzi mehfooz shelter faraham karne aur mustaqil hal ke liye mutalliqa forums par bharpoor andaz mein sifarishat pesh karne ki hidayat ki.

Is moqe par Zaraton Baloch ne kaha ke Chief Minister Mir Sarfraz Bugti ki qayadat mein hukumat-e-Balochistan shobah-e-taleem ki taraqqi, sarkari taleemi idaron mein bunyadi sahuliyat ki faraahmi, taleemi miyar ki behtari aur talibat ko mehfooz o sazgar taleemi mahaul faraham karne ke liye moassir iqdamat kar rahi hai. Unhon ne azm zahir kiya ke zila Gwadar ke tamam sarkari taleemi idaron ke masail ki barwaqt nishandehi, moassir nigrani aur marhala war hal yaqeeni bana kar hukumat ke taleemi islahati vision ko amali jama pehnaya jayega taake door daraz ilaqon ke talaba o talibat bhi miyari taleem se yaksan mustafeed ho sakein.

Tasveer: bashukriya DGPR Balochistan