Governor Jafar Khan Mandokhail ki zair-e-sadarat Women University ka Senate ijlas, campuses ke contract mulazimin regular honge
Quetta: Governor Balochistan Jafar Khan Mandokhail ne kaha hai ke hamein mulk bhar ki satah par artificial intelligence ke shobe mein das lakh mahireen tayyar karne honge, aur is azeem khwab ko haqeeqat ka roop dene ke liye tamam public sector jamiaat ke vice chancellors ko kaleedi aur faal kirdar ada karna hoga.
Unhon ne yeh baat Sardar Bahadur Khan Women University ke solhwen Senate ijlas ki sadarat karte hue kahi. Governor ne kaha ke Vice Chancellor Professor Dr Rubina Mushtaq aur un ki poori team ki koshishen layaq-e-tahseen hain, taham Women University ko Pakistan ki top universities mein lane ke liye bohat kuch karna baqi hai.
Campuses ke contract mulazimin regular honge
Supreme Court of Pakistan ke faisle ke tehat Sardar Bahadur Khan Women University ke Khuzdar, Pishin aur Nushki campuses ke un tamam contract mulazimin ko regularize kiya jayega jinhein bharti ke tamam qanooni taqaze aur muqarrara zawabit mukammal karne ke baad contract ki bunyad par tainat kiya gaya tha aur jo tahal apni khidmat anjam de rahe hain. Regularization ke amal se qabl mulazimin ki dastawezat aur deegar matlooba kawaif ki mukammal tasdeeq ke liye ek khusoosi committee bhi tashkeel de di gayi hai.
Ijlas mein Balochistan High Court ke Justice Amir Rana, soobai wazir Taleem Rahila Hameed Khan Durrani, rukn soobai assembly Kulsoom Niaz Baloch, soobai secretary Higher Education Hashim Khan Ghalzai, Higher Education Commission ki senior ohdedar Dr Noor Amna Malik, National Commission on the Status of Women ki chairperson Noreen Bano Leghari aur Principal Secretary to Governor Balochistan Abdul Nasir Dotani samet Senate members maujood the.
Governor Mandokhail ne Senate ijlas ke shurka se khitab karte hue kaha ke university ke tamam umoor o muamlat mein merit ki pasdari har soorat yaqeeni banayi jaye. Unhon ne kaha ke Women University ki ranking and scoring mein musalsal izafa khush aaind hai.
Unhon ne zor diya ke miyari Taleem aur jadeed taqazon se hum ahang modern skills development par khusoosi tawajjo di jaye taake university ki talibaat muashre ki muashi o muashrati tameer o taraqqi mein bamaani shirakat ke qabil ban saken. Senate ijlas ke shurka ki tajaweez aur sifarishat ke nateeje mein kai aham faislay bhi kiye gaye.
Tasveer: bashukriya DGPR Balochistan
Mazeed parhen: Balochistan
Zhob mein sooba-i mohtasib ki hidayat par Khuli Kachehri, shehriyon ki shikayat suni gayin
Turbat: University of Turbat ke University Model School ke Board of Trustees ka teesra ijlas
Qila Abdullah: Assistant Commissioner Sardar Abdullah Khan ki zer-e-sadarat mahkama maal ke umoor ka jaiza
Chaman: District Education Officer ke achanak muaaine, ghair hazir asatiza se wazahat talab
Loralai mein Deputy Commissioner ki sadarat mein revenue court day, muqadmat ki sama’at
Chaman: Aalmi Youm-e-Insidad-e-Polio par aagahi taqreeb, Deputy Commissioner ka khitab, front line workers ko asnaad
Shumali Dera Bugti: Chief Minister Sarfraz Bugti ki musalsal teesri Khuli Kachehri, shehriyon ke masail sune
Shumali Dera Bugti: Chief Minister Sarfraz Bugti ka naye sarkari daftar ka iftetah, tarqiyati mansoobon ka jaiza
Balochistan mein FWO ki karkardagi naqis rahi: Wazir-e-aala Sarfraz Bugti
Qila Saifullah mein karwai, aham Dehshatgardi commander halak: Ziaullah Langove
Usta Muhammad: Assistant Commissioner ka DHQ hospital ka daura, teen doctor duty par maujood nahin paye gaye
