Governor Balochistan Jafar Khan Mandokhail se Khalil George ki qiyadat mein PML-N ke aqliyati rahnumaon ki mulaqat

Quetta: Governor Balochistan Jafar Khan Mandokhail se sabiq wafaqi wazir Khalil George ki qiyadat mein Pakistan PML-N ke Quetta shehar ke mukhtalif aqliyati ilaqon ke ilaqai ohdedaran aur rahnumaon ne mulaqat ki aur unhein America ke kamyab daure aur Aqwam-e-Muttahida ke headquarters New York mein Youth and Artificial Intelligence Summit mein shirkat aur khitab par mubarakbad pesh ki.

Governor Jafar Khan Mandokhail ne daura-e-America ke baad watan wapsi par istaqbal aur mubarakbad dene par aqliyati biradari ke numainda’on ka khusoosi shukriya ada karte hue kaha ke Aqwam-e-Muttahida ke headquarters New York mein Youth and Artificial Intelligence Summit se khitab Pakistan aur Balochistan ke liye aik aizaz hai.

Unhon ne kaha ke wahan alami sarbarahi ijlas se khitab ho ya America mein muqeem Pakistani community ki janib se Yaum-e-Azadi Pakistan ke silsile mein munaqida taqribat, har moqe par Pakistan aur Balochistan ki numainda’gi karna aur apne nau jawanon ki awaz ko alami satah par ujagar karna mere liye baais-e-aizaz hai. In mawaqe par duniya bhar se aaye hue mandoobeen aur America mein muqeem Pakistani community ki janib se bharpoor pazirai aur izzat afzai mili.

«Hum sab Pakistani hain»

Governor Balochistan ne kaha ke mujhe yeh jaan kar bhi khushi hui ke America mein muqeem Pakistaniyon ke dilon mein apne mulk aur awam ke liye be panah mohabbat aur wabastagi maujood hai. Unhon ne Texas, Houston aur Los Angeles mein Pakistani community ki janib se munaqida taqribat mein shirkat ka zikr karte hue kaha ke America mein muqeem Pakistaniyon ki aik badi tadad tijarat aur karobar se wabasta hai aur woh Pakistan ki maeeshat ke liye bhi aham kirdar ada kar rahe hain.

Jafar Khan Mandokhail ne kaha ke hamara talluq bilashuba mukhtalif qaumon, mazahib aur ilaqon se ho sakta hai, lekin hum sab Pakistani hain. Aain-e-Pakistan ki nazar mein tamam shehri barabar hain aur humein bahami ittehad, ehtiram aur yakjehti ke sath mulk o qaum ki taraqqi ke liye apna kirdar ada karna hoga. Unhon ne PML-N mein aqliyati rahnumaon aur numainda’on ki shamooliyat ko khush aaind qarar dete hue unhein khush amdeed kaha aur kaha ke ab hum sab ki mushtarka zimmedari hai ke muttahid ho kar awam ki khidmat karein aur mulk o soobe ki taraqqi mein apna kirdar ada karein.

Is moqe par soobai wazir Muhammad Khan Lehri ne kaha ke aqliyat hon ya aksariyat, hum sab aik hi mulk ke bashinde hain. Christian bhi hamare bhai hain aur Pakistan ki tameer o taraqqi mein aqliyati biradariyon ka kirdar qabil-e-qadar hai. Unhon ne bhi Governor Balochistan ko daura-e-America ki kamyabi aur alami forum par Pakistan o Balochistan ki moassir numainda’gi par mubarakbad pesh ki.

Qabl azin sabiq wafaqi wazir Khalil George ne kaha ke Aqwam-e-Muttahida ke headquarters New York mein Youth International Organization ke zer-e-ihtimam Youth and Artificial Intelligence Summit mein Governor Balochistan ki shirkat aur khitab hum sab ke liye baais-e-fakhr o masarrat hai. Unhon ne kaha ke aaj hum maseehi aur hindu biradari ki janib se Governor Balochistan ko un ke kamyab daura-e-America par mubarakbad pesh karte hain, aur alami forum par Pakistan aur Balochistan ke naujawanon ki awaz moassir andaz mein pesh karna aik qabil-e-tehseen iqdam hai.

Mulaqat ke ikhtitam par PML-N ki soobai rahnuma Sana Intezar ne Governor Balochistan ko guldasta pesh kiya jabke deegar numainda’on ne unhein haar pehnaye.

Tasveer: Bashukriya DGPR Balochistan