Government Girls Degree College Ziarat mein Teachers Day ki taqreeb, talibaat ka asatiza ko khiraj-e-tahseen

Ziarat: Government Girls Degree College Ziarat mein asatiza ki ilmi, akhlaqi aur tarbiyati khidmaat ko khiraj-e-tahseen pesh karne ke liye Teachers Day ke hawale se purwaqar taqreeb munaqid hui. Taqreeb ke mehman-e-khusoosi Al-Hijra College ke principal Professor Shabbir Ahmed Barech the, jabke college ki principal samet asatiza aur talibaat ne bharpoor shirkat ki.

Talibaat ne asatiza se mohabbat, aqeedat aur ehtram ke izhar ke liye mukhtalif program pesh kiye aur Urdu o Angrezi taqareer mein asatiza ki mehnat, rehnumai, kirdar sazi aur taleemi khidmaat ko khiraj-e-tahseen pesh kiya. Talibaat ne asatiza ko tohfe diye jis par asatiza ne un ka shukriya ada kiya. "Happy Teachers Day" darj khusoosi cake ki runumai bhi hui jise asatiza aur talibaat ne mil kar kata.

Taqreeb se Professor Abdul Hameed, Professor Ajab Khan, mehman-e-khusoosi Professor Shabbir Ahmed Barech, principal Government Girls Degree College Ziarat Professor Naqeeb Kakar aur deegar asatiza ne khitab kiya aur asatiza ke maqam, talibaat ki tarbiyat o kirdar sazi aur muashre ki tameer mein ustad ki ahmiyat par roshni dali.

Akhri marhale mein Urdu taqreeri muqable mein numayan position hasil karne wali talibaat mein inamaat taqseem kiye gaye aur asatiza ko un ki khidmaat ke aitraf mein souvenirs aur shields pesh ki gayin. Principal ki janib se talibaat ke liye chai party ka ehtimam bhi kiya gaya, jis par talibaat ne college intezamia aur asatiza ka shukriya ada kiya.

Tasveer: bashukriya DGPR Balochistan