Government Degree College Ziarat mein Youm-e-Difa Pakistan ki taqreeb, Assistant Commissioner Sher Shah Ghilzai mehman-e-khusoosi

Ziarat: Chief Minister Balochistan Mir Sarfraz Bugti ke vision, Deputy Commissioner Ziarat Abdul Qudoos Achakzai ki hidayat aur Principal Government Degree College Ziarat Professor Naqeebullah Kakar ki sarbarahi mein 6 September Youm-e-Difa Pakistan ke hawale se college mein aik purwaqar aur milli jazbe se bharpoor taqreeb munaqid ki gayi.

Taqreeb ke mehman-e-khusoosi Assistant Commissioner Ziarat Sher Shah Ghilzai the, jabke college ke asatiza, talba aur deegar afrad ne bharpoor shirkat ki. Taqreeb ka maqsad talba mein hubb-ul-watani, qaumi yakjehti aur qurbani ke jazbe ko ujagar karna aur naujawan naslon ko Youm-e-Difa ki tareekhi ahmiyat se aagah karna tha.

Tilawat-e-kalam-e-Pak ke baad talba ne qaumi tarana, milli naghme, taqareer aur deegar programme pesh kiye aur 6 September 1965 ko watan ke difa ke liye Pak Army ke jawanon, shuhada aur qaumi heroes ki qurbaniyon ko khiraj-e-tehseen pesh kiya. Muqarrireen ne kaha ke 6 September qaumi tareekh ka qabil-e-fakhr din hai jab qaum ne musallah afwaj ke shana ba shana mutahid ho kar watan ke difa ka suboot diya, aur yeh din hamein ittehad, nazm o zabt aur hubb-ul-watani ka dars deta hai.

Assistant Commissioner Sher Shah Ghilzai ne talba ke programmes ko sarahte hue kaha ke naujawan nasl mulk ka mustaqbil hai aur talba Taleem ke sath qaumi zimmedariyon, nazm o zabt aur hubb-ul-watani ko bhi apni zindagi ka hissa banayen. Principal Professor Naqeebullah Kakar ne kaha ke aise programme talba mein qaumi shaoor aur watan se mohabbat ko farogh dete hain aur qaum apne bahadur saputon ki qurbaniyon ko hamesha yaad rakhegi.

Taqreeb se Professor Kareem Kakar, Professor Ajab Khan aur Naseebullah Kakar ne bhi khitab kiya. Talba ne josh o jazbe ka muzahira karte hue Pakistan ke haq mein nare lagaye aur aakhir mein shuhada ke darjaat ki bulandi aur mulk ki salamti, aman aur khushhali ke liye dua ki gayi.

Tasveer: Bashukriya DGPR Balochistan