Government Boys Degree College Ziarat mein Teachers Day ki taqreeb, taqareer, cake cutting aur saqafati Attan

Ziarat: Government Boys Degree College Ziarat mein asatiza ki ilmi, akhlaqi aur tarbiyati khidmat ko kharaj-e-tehseen pesh karne ke liye Teachers Day ke hawale se purwaqar taqreeb munaqid hui. Taqreeb ke mehman-e-khusoosi Professor Baloch Khan the, jabke college ke principal Professor Naqeebullah Kakar samet asatiza aur talba ne bharpoor shirkat ki.

Talba ne asatiza se mohabbat, aqeedat aur ehteram ke izhar ke liye mukhtalif program pesh kiye aur Urdu o English taqareer mein apne asatiza ki mehnat, rehnumai, kirdar sazi aur taleemi khidmat ko kharaj-e-tehseen pesh kiya. Talba ne asatiza ko tohfe bhi diye, jabke "Happy Teachers Day" darj khusoosi cake ki runumai hui jise asatiza aur talba ne mil kar kaata.

Taqreeb se Professor Abdul Hameed, Professor Ajab Khan, Professor Baloch Khan aur principal Professor Naqeebullah Kakar ne khitab kiya aur asatiza ke azeem maqam, talba ki tarbiyat mein un ke kirdar aur muashre ki tameer o taraqqi mein ustad ki ahmiyat par roshni dali.

Akhri marhale mein Urdu taqreeri muqable mein numayan position hasil karne wale talba mein inamat taqseem kiye gaye, jabke professor sahiban ko un ki ilmi, tadrisi aur intizami khidmat ke aitraf mein souvenirs aur shields pesh ki gayin. Principal ki janib se talba ke liye chai party ka ehtimam kiya gaya.

Taqreeb ke ikhtitam par saqafati Attan (Attan) ka muzahira pesh kiya gaya jis mein talba ne rawayati josh o jazbe se hissa liya. Program ko ustad aur shagird ke rishte, ehtram-e-ustad, taleemi iqdar aur muqami saqafat ka haseen imtizaj qarar diya gaya, aur is ahd ki tajdeed ki gayi ke ustad ki izzat, ilm ki qadr aur taleem ke farogh se ek behtar muashra tashkeel diya ja sakta hai.

Tasveer: bashukriya DGPR Balochistan