Engineering University Khuzdar mein Hydrothon 2026 ka inaqad, pani ki bachat aur mausamiyati tabdeeli par zor

Khuzdar: Balochistan University of Engineering and Technology Khuzdar ke auditorium mein Hydrothon 2026 ka shandar aur kamyab inaqad kiya gaya. Taqreeb ka ehtimam university ki Peace and Character Building Society ne Revival of Balochistan Water Resources Programme (RBWRP) ke tahat Aqwam-e-Muttahida ke idara baraye khorak o Zaraat (FAO) aur European Union ke ishtirak se kiya.

Taqreeb ki majmui mansooba bandi, intizamat aur inaqad RBWRP ke project coordinator Asrar Raisani, project manager engineer Shakeel Baloch aur Communication, Outreach and Engagement Specialist Syed Abdullah Shah ne anjam diye.

«Ab waqt amli taur par kuch kar dikhane ka hai»

Taqreeb ke mehman-e-khusoosi Pro Vice Chancellor Engineering University Khuzdar Dr Sohrab Khan Bizenjo the. Unhon ne muntazimin ki kawishon ko sarahte hue kaha ke nojawanon ko paidar abi wasail ke intizam, mausamiyati tabdeelion se hum ahangi, mahaulyati tahaffuz aur qudrati wasail ke zimmedarana istemal se agah karna waqt ki aham zaroorat hai, aur unhon ne is nauiyat ki sargarmiyon ko Balochistan ke mustaqbil ke liye nihayat aham qarar diya.

Dr Sohrab Bizenjo ne shurka ko amli iqdamat ki taraf mutawajjah karte hue kaha ke ab waqt sirf mashware dene ka nahin balke amli taur par kuch kar dikhane ka hai. «Pani hamari sab se bunyadi zaroorat hai, is liye hum sab ko mil kar pani ki bachat karni hogi. Yeh bachat hum ne apne liye aur apne aane wale kal ke liye karni hai.»

Is moqe par talba ka kehna tha ke yeh mansooba khusoosi taur par Hingol aur Hamoon Mashkel ke dariyai tasoon ko hadaf banata hai, jo khushk sali aur zer-e-zameen pani ki shadeed kami ka shikar hain. Hydrothon 26 jaise iqdamat se maqami nojawanon mein masail ki nishandahi aur un ke hal ka ehsas paida hoga, jabke barani pani jama karne, smart abpashi ke tareeqon, kam pani wali faslon ki kasht aur diesel boring par inhisar kam kar ke mutabadil tawanai ki taraf muntaqili mein madad milegi.

Mubahisay, poster, photography aur theatre ke muqable

Taqreeb mein Registrar Dr Syed Jalal Shah, Director General Quality Enhancement Cell engineer Liaqat Ali Lehri, RBWRP South ke project manager engineer Shakeel Ahmed, HR manager Asrar Raisani, Subject Matter Expert Dr Salahuddin, Syed Abdullah Shah, monitoring officer Farhan Magsi, IT expert engineer Sher Mengal, university ke tamam shobajat ke chairman, FAO Khuzdar ke numainde Rizwan Ahmed apni team ke hamrah aur FAO Quetta ke numainde engineer Ihtisham ul Haq ne shirkat ki, jabke engineer Talal Naseer aur Asad online programme ka hissa bane.

Hydrothon 2026 ke dauran talba o talibat ke liye angrezi aur Urdu mubahisay, poster, photography, mukhtasar dastawezi film (short documentary) aur theatre performance ke muqable munaqid hue, jin ka markazi mauzu paidar abi wasail ka intizam, mausamiyati lehaz se muwafiq Zaraat, livestock ki taraqqi aur rangeland ka tahaffuz tha. Talba ne bharpoor josh o kharosh se apni takhliqi salahiyaton, jidat pasandi aur mahaulyati shaoor ka muzahira kiya.

Taqreeb ke ikhtitam par numayan karkardagi dikhane wale talba o talibat mein shields aur asnad taqseem ki gayin. Muntazimin ne FAO, European Union, university intizamia, BRC ke professor Inamullah Mengal samet faculty members, judges, talba, sahafi biradari aur tamam shurka ka shukriya ada kiya. Taqreeb mein is azm ka eada kiya gaya ke university, FAO aur European Union paidar qudrati wasail ke moassir intizam, abi wasail ke tahaffuz, mausamiyati tabdeelion se nimatne aur nojawanon ko mustaqbil ke mahaulyati challenges ke liye baikhtiyar banane ke mushtarka mission par karband hain.

Tasveer: Bashukriya DGPR Balochistan