Duki mein Youm-e-Istehsal Kashmir par rally aur seminar, Assistant Commissioner Thal Chotiali Abdul Salam Shahwani ki sadarat

Duki: Hukumat-e-Balochistan ke vision aur Chief Minister Balochistan Mir Sarfraz Bugti ki hidayat ki roshni mein zila intizamiya Duki ke zere-e-ehtemam Youm-e-Istehsal Kashmir qaumi jazbe aur bharpoor yakjehti ke sath manaya gaya. Is silsile mein rally, seminar aur duaiya taqreeb munaqid hui, jin ki sadarat Assistant Commissioner Thal Chotiali Abdul Salam Shahwani ne ki.

Taqreebat ka aghaz rally se hua, jis mein sarkari mehkamon ke afsaran, ahalkaron, siyasi o samaji shakhsiyaat, talba aur shehriyon ne badi tadad mein shirkat ki. Shurka ne qaumi parcham, banners aur placards utha rakhe the jin par Kashmiri awam ki himayat, haq-e-khud iradiyat aur Bharati iqdamaat ke khilaf nare darj the.

Taqreeb se khitab mein Abdul Salam Shahwani ne kaha ke 5 August 2019 ko Bharat ki janib se maqbooza Jammu o Kashmir ki khusoosi aini haisiyat ka khatma International qawanin, Aqwam-e-Muttahida ki qarardadon aur Kashmiri awam ke bunyadi huqooq ki sareeh khilaf warzi tha. Unhon ne kaha ke Pakistan apne usooli mauqif ke mutabiq har siyasi, safarati aur akhlaqi forum par Kashmiri awam ke haq-e-khud iradiyat ki himayat jari rakhe hue hai aur yeh himayat bila tatal jari rahegi.

Deegar muqarrireen ne kaha ke is din ka maqsad alami biradari ki tawajjoh maqbooza Kashmir mein insani huqooq ki musalsal khilaf warziyon, shehri azadiyon par pabandiyon aur Kashmiri awam ki mushkilat ki janib mabzool karana hai, aur masla-e-Kashmir ka paedar hal Aqwam-e-Muttahida ki qarardadon aur Kashmiri awam ki umangon ke mutabiq hi mumkin hai. Unhon ne kaha ke Pakistan aur Balochistan ke awam Kashmiri bhaiyon aur behnon ke shanaba shana khade hain.

Taqreeb ke ikhtitam par Kashmir ke shuhada ke darjat ki bulandi, Kashmiri awam ki jald azadi aur Pakistan ki salamti, istehkam, taraqqi aur khushhali ke liye khusoosi dua ki gayi.

Tasveer: Bashukriya DGPR Balochistan