Duki mein NOC ke baghair bore lagane par pabandi, District Water Committee ka pehle se nasb bores regularize karne ka faisla

Duki: Deputy Commissioner Duki Fazal ur Rehman Kabdani ki zair-e-sadarat District Water Committee ka ijlas munaqid hua, jis mein DSP Ali Hasan Lashari samet committee ke deegar members ne shirkat ki. Ijlas mein zair-e-zameen pani ke zakhair ke tahaffuz, bores ki tansib, pani ke istemal ko munazzam banane aur abi wasail se mutaliq deegar umoor ka tafseeli jaiza liya gaya.

Afsaran ne zile mein zair-e-zameen pani ki maujooda surat-e-haal aur abi wasail ko darpesh masail par briefing di, jabke pani ke ziya ki rok tham aur dastiyab wasail ke muassir istemal ke liye mukhtalif tajaweez par ghaur kiya gaya.

Deputy Commissioner ne wazeh kiya ke mutaliqa NOC ke baghair kisi ko bore lagane ki ijazat nahin di jaye gi aur khilaf warzi par qanoon o zawabit ke mutabiq karrawai hogi. Unhon ne hidayat ki ke pehle se nasb bores ka record murattab karke unhein qawaid ke mutabiq regularize kiya jaye aur un ke liye NOC ke ijra ka tareeqa-e-kar mukammal kiya jaye.

Fazal ur Rehman Kabdani ne zair-e-zameen pani ke zakhair ke tahaffuz, bores ki tansib ki muassir nigrani aur abi wasail ke munazzam o paedar istemal ke liye tamam zaroori iqdamat uthane ki hidayat ki.

Tasveer: Bashukriya DGPR Balochistan