Duki mein Khuli Kachehri: Deputy Commissioner Fazal ur Rehman Kabdani ka pani, bijli, Sehat aur BSDI shikayat par fori iqdamat ka hukum

Duki: Deputy Commissioner Duki Fazal ur Rehman Kabdani ki zer-e-sadarat Deputy Commissioner office mein awami Khuli Kachehri munaqid hui, jis mein pani, bijli, taleem, Sehat aur Balochistan Special Development Initiative (BSDI) ke taraqqiyati mansoobon se mutaliq awami masail barah-e-raast sune gaye aur mutaliqa mehkamon ko fori iqdamat ki hidayat di gayin.

Khuli Kachehri mein 87 Wing ke Commanding Officer Colonel Shahid Bilal, SP Duki Mansoor Ahmed Bizdar, Chairman Municipal Committee Duki Malik Kalimullah Khan Tareen, DHO Dr Bahadur Khan Luni, MS Dr Johar Khan Shadozai, mukhtalif mehkamon ke afsaran, umaidin-e-ilaqa aur shehriyon ne bari tadad mein shirkat ki. Shehriyon ne pani, bijli, taleem, Sehat, safai, baladiyati sahuliyat aur BSDI ke tehat jari mansoobon se mutaliq shikayat pesh kin.

Deputy Commissioner ne kaha ke sarkari afsaran awam par hukum chalane ke liye nahin balke awam ke khadim ki haisiyat se zimmedariyan ada karne ke paband hain. Sarkari funds awam ki amanat hain aur un ka shaffaf istemal awami falah aur buniyadi sahuliyat ki faraahmi par yaqeeni banaya jaye.

BSDI mansoobon ki barwaqt takmeel

Unhon ne kaha ke BSDI ke tehat zila Duki mein jari mansoobon ki barwaqt aur miyari takmeel par khusoosi tawajjo di ja rahi hai, aur hidayat ki ke taraqqiyati schemes mein miyar, shaffafiyat aur raftar muqaddam rakhi jaye, kisi ghaflat ya ghair zaroori takhir ko bardasht nahin kiya jayega. Unhon ne afsaran ko awami shikayat ke hal ke liye fori aur amli iqdamat karne aur shehriyon ko sarkari daftar ke ghair zaroori chakkaron se bachane ki hidayat ki.

Deputy Commissioner ne kaha ke Khuli Kachehriyon ka maqsad awam aur intizamiya ke darmiyan fasle khatam kar ke barah-e-raast rabta mazboot banana hai, aur intizamiya ke darwaze awam ke liye khule rahenge. Unhon ne afsaran par field mein maujoodgi yaqeeni banane aur barwaqt nigrani o mansoobabandi se masail ka peshgi hal nikalne par zor diya.

Afsaran ne mutaddid shikayat ke hal ke liye hidayat aur iqdamat se agah kiya jabke digar masail tarjihi bunyadon par hal karne ki yaqeen dehani karai gayi. Awami halqon ne Khuli Kachehri ko zilai intizamiya ka musbat aur awam dost iqdam qarar diya.

Tasveer: bashukriya DGPR Balochistan