Duki mein 12 Rabi ul Awwal ke julus ke liye security aur traffic intezamat ka jaiza, Deputy Commissioner ki hidayat

Duki: Deputy Commissioner Duki Fazal ur Rehman Kabdani ki zair-e-sadarat 12 Rabi ul Awwal ke mauqe par julus aur deegar mazhabi programmon ke liye security o intezami intezamat ka jaiza lene ke liye aham ijlas munaqid hua, jis mein SP Duki Mansoor Ahmed Bizdar, Chief Officer Municipal Committee Samundar Khan Nasir, MS District Headquarter Hospital Dr Johar Shadozai aur Milad Committee ke numainday ne shirkat ki.

Ijlas mein julus ke routes, security intezamat, traffic management aur deegar zaroori intezamat ka tafseeli jaiza liya gaya. Deputy Commissioner ne hidayat ki ke julus aur mazhabi programmon ke dauran awam ko har mumkin sahulat faraham ki jaye aur tamam intezamat barwaqt mukammal kiye jayen.

Unhon ne security idaron aur zila intezamiya ke darmiyan mouassir rabta kari, julus ke routes par munasib security aur traffic ki rawani ke liye jame hikmat-e-amli apnane par zor diya aur kaha ke mazhabi programmon ke pur-aman aur munazzam inaqad ke liye tamam mahkamay bahami taawun aur zimmedari se faraiz anjam dein.

Tasveer: Bashukriya DGPR Balochistan