Duki: Deputy Commissioner Fazal ur Rehman Kabdani ka zer-e-tameer District Complex aur Duki ta Chamalang road ka moayna

Duki: Deputy Commissioner Duki Fazal ur Rehman Kabdani ne Commander 87 Wing Colonel Shahid Bilal ke humrah Public Sector Development Programme (PSDP) ke tahat zer-e-tameer District Complex ka daura kiya aur mukhtalif sarkari daftar ki tameeraati sargarmiyon ki pesh raft ka jaiza liya.

Deputy Commissioner ne tameeraati kaam ke miyar, raftar aur mujmui pesh raft ka moayna karte hue mutaliqa hukkam aur tameeraati idaron ko hidayat ki ke kaam mein tezi layi jaye aur tamam marahil muqarara waqt mein mukammal kiye jayen.

Baad azan unhon ne Commander 87 Wing ke humrah Duki ta Chamalang road ka bhi moayna kiya aur sadak ke mukhtalif hisson par tameeraati sargarmiyon aur mansoobe ki pesh raft se mutaliq maloomat hasil kin.

Fazal ur Rehman Kabdani ne kaha ke taraqqiyati mansoobon mein miyar par koi samjhauta na kiya jaye, tameeraati material ka miyar yaqeeni banaya jaye aur mansoobe muqarara timeline ke mutabiq jald mukammal kiye jayen. Unhon ne wazeh kiya ke zila intizamiya pesh raft ki musalsal nigrani jari rakhegi aur ghair zaroori takheer ya miyar mein kotahi bardasht nahin ki jayegi, kyunke behtar infrastructure ilaqe ki maashi o samaji taraqqi mein aham kirdar ada karta hai.

Tasveer: Bashukriya DG PR Balochistan