Duki: DC Fazal ur Rehman Kabdani ki zer-e-sadarat explosives monitoring committee ka ijlas, ghair qanooni farokht par pabandi

Duki: Deputy Commissioner Duki Fazal ur Rehman Kabdani ki zer-e-sadarat District Explosives Monitoring Committee ka aham ijlas munaqid hua jis mein Commander 87 Wing Colonel Shahid Bilal, SP Duki Mansoor Ahmed Bazdar, Assistant Commissioner Loni Fateh Khan Bangulzai, Mines Inspector aur security idaron ke numainda’on ne shirkat ki.

Ijlas mein zile mein explosives material ki ghair qanooni kharid o farokht, zakhira aur istemal ki rok tham aur is se mutaliq sargarmiyon ki moassir nigrani ka tafseeli jaiza liya gaya. Shurka ne baghair license kharid o farokht aur ghair qanooni istemal mein mulawwis anasir ke khilaf qanoon ke mutabiq sakht karrawai par zor diya.

Deputy Commissioner ne hidayat ki ke explosives material ki ghair qanooni kharid o farokht par mukammal pabandi yaqeeni banai jaye aur license ke baghair kisi sargarmi ki ijazat na di jaye. Unhon ne kaha ke yeh na sirf qanoon ki khilaf warzi hai balke is se insani jaanon aur awami o qaumi amlak ko sangeen khatrat lahiq ho sakte hain.

Unhon ne police, Mines hukkam aur deegar security idaron ko mulawwis afrad ke khilaf bila imtiaz qanooni karrawai ki hidayat ki. Ijlas mein nigrani aur checking ke nizam ko mazeed moassir banane par bhi ittefaq kiya gaya.

Tasveer: Bashukriya DG PR Balochistan