District Health Officer Gwadar ka Pasni ke Pak-Oman Hospital, Rek Pusht dispensary aur BHU Babar Shor ka daura

Pasni: Chief Minister Balochistan Mir Sarfraz Bugti ke awam dost vision ke mutabiq har shehri ko us ki dehleez par miyari aur buniyadi tibbi sahuliyat ki farahmi yaqeeni banane ke liye mahkama Sehat Gwadar apni sargarmiyan mazeed mu’assir andaz mein jari rakhe hue hai. Isi silsile mein District Health Officer Gwadar Dr Yasir Tahir ne Pak-Oman Hospital Pasni, Civil Dispensary Rek Pusht aur Buniyadi Markaz-e-Sehat (BHU) Babar Shor ka tafseeli daura kiya.

Daure ke dauran Dr Yasir Tahir ne sehat markaz mein dastiyab tibbi sahuliyat, adwiyat ke zakheere, tibbi aalat, amle ki hazri, OPD record, safai ki surat-e-haal aur mareezon ko faraham ki jane wali tibbi khidmat ka tafseeli jaiza liya. Unhon ne mareezon aur maqami afrad se mulaqat kar ke un ke masail maloom kiye aur un ke barwaqt aur mu’assir hal ke liye muta’alliqa hukkam ko zaroori hidayat jari keen.

District Health Officer ne tibbi amle par zor diya ke woh apni pesha waranah zimmedariyan poori diyanatdari aur ehsas-e-zimmedari ke sath anjam dein, mareezon se khush akhlaqi se pesh aayen aur sarkari auqat-e-kaar ke dauran awam ko bila ta’attul miyari tibbi sahuliyat faraham karen. Unhon ne wazeh kiya ke tibbi markaz mein adwiyat ki dastiyabi, amle ki hazri aur ilaj mu’alije ke miyar par koi samjhauta nahin kiya jaye ga.

Dr Yasir Tahir ne kaha ke Chief Minister Balochistan Mir Sarfraz Bugti ki khusoosi hidayat ki roshni mein mahkama Sehat Gwadar door uftada ilaqon tak miyari tibbi sahuliyat ki farahmi, buniyadi marakiz-e-sehat ki fa’aliyat mein behtari aur awam ko barwaqt ilaj ki sahulat dene ke liye amli iqdamat jari rakhe hue hai.

Zila mahkama Sehat ki jari monitoring aur musalsal field visits ke bais sehat marakiz ki karkardagi mein behtari aa rahi hai, aur awam ko behtar, barwaqt aur miyari tibbi khidmat ki farahmi yaqeeni banane ke liye nigrani ka silsila aainda bhi isi jazbe ke sath jari rakha jaye ga.

Tasveer: bashukriya DGPR Balochistan