DIG Motorway Police Dr Qureshi Khan: Quetta ke shehri Motorway Police ki driving license sahulat se faida uthayen

Quetta: Deputy Inspector General National Highway and Motorway Police West Zone Quetta Dr Qureshi Khan ne kaha hai ke Motorway Police shahrahon par shehriyon ke mehfooz safar, traffic qawanin ki pabandi aur hadsat ki rok tham ke liye moassir iqdamat kar rahi hai, jabke musafiron ko barwaqt imdad aur rehnumai ki faraahmi bhi idare ki bunyadi zimmedariyon mein shamil hai.

Unhon ne kaha ke Quetta mein Motorway Police ki janib se driving license ke ijra ki sahulat Balochistan ke shehriyon ke liye ek aham moqa hai. Mulk ke mehdood shehron mein Motorway Police ko driving license jari karne ki sahulat hasil hai, is liye Quetta aur Balochistan ke shehri is se bharpoor faida uthayen aur muqarrara tareeqa-e-kaar ke mutabiq license hasil karen. Un ka kehna tha ke driving license sirf ek dastaweez nahin balke driver ki ahliyat aur zimmedarana driving ka aitraf hai, is liye baghair license driving se ijtinab kiya jaye.

Hadsat ke bade asbab

Dr Qureshi Khan ne kaha ke qaumi shahrahen aur motorways mulk ke mukhtalif ilaqon ko milane wale aham zaraye hain jahan rozana lakhon musafir, transporters aur maal bardar gariyan safar karti hain, is liye qawanin ki pabandi ke sath driverson mein road safety ka shaoor ujagar karna nagzeer hai. Unhon ne kaha ke tez raftari, khatarnak overtaking, driving ke douran mobile phone ka istemal, lane ki khilaf warzi, ghaflat o laparwahi aur musalsal driving se thakan aur neend ka ghalba hadsat ke bade asbab hain, jin ki rok tham ke liye musalsal gasht aur nigrani ki jati hai aur khilaf warzi par qanoon ke mutabiq karrawai hoti hai.

DIG ne wazeh kiya ke Motorway Police ka kirdar sirf karrawai tak mehdood nahin; gari kharab hone, hadse, tibbi hangami soorat-e-haal ya kisi bhi pareshani mein officers aur ehlkar fori taur par musafiron ki madad karte hain aur zaroorat ke mutabiq mutaliqa idaron ko bhi mutaharrik kiya jata hai.

Unhon ne driverson par zor diya ke muqarrara raftar ki pabandi karen, seat belt ka istemal yaqeeni banayen, ghair zaroori aur khatarnak overtaking se gurez karen, gari chalate hue mobile phone istemal na karen aur taweel safar mein munasib waqfa le kar thakan door karen taake ghunoodgi ke bais hadsat se bacha ja sake.

Jadeed zaraye se nigrani

Dr Qureshi Khan ne kaha ke qaumi shahrahon par shehriyon ki jaan o maal ka tahaffuz Motorway Police ki bunyadi tarjeeh hai, jis ke liye traffic ki rawani, sarkon ki soorat-e-haal aur mausami halat par musalsal nazar rakhi jati hai. Badalte taqazon ke pesh-e-nazar nigrani aur traffic management ke nizam ko mazeed moassir banane ke liye jadeed zaraye se istifada kiya ja raha hai aur hadsat ki sharah mein kami ke liye dastyab wasail moassir andaz mein istemal ho rahe hain.

Unhon ne shehriyon se appeal ki ke traffic qawanin ko mehaz qanooni taqaza nahin balke apni aur doosron ki zindagiyon ke tahaffuz ka zariya samjhen, Motorway Police se taawun karen aur zimmedarana tarz-e-driving ikhtiyar karen. Un ka kehna tha ke mehfooz shahrahon ka maqsad sirf idara jati iqdamat se hasil nahin ho sakta balke driverson, musafiron aur awam ka zimmedarana rawaiya bhi bunyadi ahmiyat rakhta hai.

Tasveer: Bashukriya DGPR Balochistan