Dera Murad Jamali: Shehriyon ko arazi ki allotment chand dinon mein shuru hogi, Deputy Commissioner Naseerabad Virendar Lal

Naseerabad: Deputy Commissioner Naseerabad Virendar Lal ki zer-e-sadarat allotment committee ka aham ijlas munaqid hua, jis mein Dera Murad Jamali shehr ke shehriyon ko arazi ki allotment se mutaliq umoor ka tafseeli jaiza liya gaya. Ijlas mein hukumat-e-Balochistan ke jari kardah allotment ahkamat, mojooda surat-e-haal aur shehriyon ke taweel arsay se pesh kiye jane wale mutalibe par ghaur kiya gaya.

Ijlas ko bataya gaya ke hukumat-e-Balochistan ki hidayat ke tehat arazi ki allotment ka amal jadeed satellite system ke zariye mukammal kiya jana tha, taham baaz technical aur intizami wujuhat ki bina par yeh amal tahal mukammal nahin ho saka, jis ke baais mamla takheer ka shikar hai.

Deputy Commissioner Virendar Lal ne kaha ke Dera Murad Jamali ke shehriyon ki deirina zaroorat aur jaiz mutalibe ko madde-nazar rakhte hue allotment ka amal jald mazeed moassar aur tez raftari se aage barhaya jaye. Shehriyon ki mushkilat ka izala zilai intizamia ki awwaleen tarjihat mein shamil hai, is liye tamam qanooni taqazon, hukumati ahkamat aur shaffafiyat ke usoolon ko malhooz-e-khatir rakhte hue amali iqdamat kiye jayen.

Unhon ne officers ko hidayat ki ke allotment se mutaliq record, dastawezat aur deegar zaroori umoor ki mukammal jaanch partal ki jaye taake koi qanooni ya intizami pechidgi paida na ho aur ahl shehriyon ko un ka jaiz haq ba-waqt mil sake.

Deputy Commissioner ne kaha ke allotment ka aghaz chand dinon mein kiya jayega aur is amal mein merit, shaffafiyat aur qawaid o zawabit ki mukammal pabandi yaqeeni banai jayegi, jabke shehriyon ke deirina masle ke hal ke liye tamam dastiyab wasail barooye kaar laye jayenge.

Tasveer: Bashukriya DGPR Balochistan