Dera Murad Jamali mein pani ki qillat: Deputy Commissioner Naseerabad ke notice par Lango Mohalla aur Clerk Colony mein faraahmi bahaal

Naseerabad: Deputy Commissioner Naseerabad Virendar Lal ne Dera Murad Jamali ke shehriyon ki janib se pani ki qillat se mutaliq mausool hone wali shikayat ka fori notice lete hue mutaliqa afsaran ko hangami bunyadon par iqdamat ki hidayat jari kar di.

Awami shikayat ke paish-e-nazar Deputy Commissioner ne Lango Mohalla, Clerk Colony aur milhiqa ilaqon mein pani ki faraahmi ki bahali ke liye fori ahkamat jari kiye. In ahkamat par amaldaramad karte hue Assistant Commissioner Bahadur Khan Khosa, Tehsildar Moazzam Khan Jatoi aur revenue amle ne barwaqt karwai ki aur Jamali Wah se talabon tak pani ki supply shuru kar di, jis se mutasira ilaqon mein pani ki faraahmi bahaal ho gayi.

Zilai intizamia ke mutabiq pani ki faraahmi ka yeh silsila bila tatal jari rakha jayega taake shehriyon ko kisi qism ki pareshani na ho. Assistant Commissioner Bahadur Khan Khosa ki nigrani mein poori raat pani ki faraahmi ka amal jari raha, jabke Deputy Commissioner Virendar Lal khud bhi surat-e-haal ki musalsal nigrani karte rahe aur lamha ba lamha report hasil karte rahe.

Deputy Commissioner Naseerabad ne kaha ke awami masail ka fori hal zilai intizamia ki awwaleen tarjeeh hai. Unhon ne hidayat ki ke awami shikayat par barwaqt aur moassir karwai yaqeeni banai jaye aur bunyadi sahuliyat ki faraahmi mein kisi qism ki kotahi bardasht nahin ki jayegi. Unhon ne kaha ke awami masail ke hal ke liye tamam dastiyab wasail baroye kaar laye jayenge aur shehriyon ko har mumkin relief faraham kiya jayega.

Tasveer: Bashukriya DGPR Balochistan