Dera Murad Jamali ka 2 arab 50 crore rupay ka taraqqiyati package: Commissioner Naseerabad ka miyar par samjhauta na karne ka elan

Naseerabad: Commissioner Naseerabad Division Salahuddin Nurzai ki zer-e-sadarat Integrated Development Package barai Dera Murad Jamali (marbut taraqqiyati package) ki pesh raft ka jaiza lene ke liye ijlas munaqid hua, jis mein SSP Naseerabad Asad Nasir, Communication and Works Department ke sub divisional afsaran Abid Ali Pahnwar aur Sajjad Ali Umrani samet digar afsaran shareek hue.

Mansube mein kya shamil hai

Project Coordinator Saleh Shah ne briefing mein bataya ke package ke tahat sharqi side par 22 kilometre blacktop sarkein, mukhtalif qutr ki pipelines samet 26 kilometre nayi water supply lines, ek pumping station, do water tank, do storage tank, 30 hazar gallon gunjaish ka overhead tank aur 23 kilometre se zaid jadeed sewerage system tameer kiya ja raha hai, jabke saat solarized pumping station bhi mansube ka hissa hain. Ijlas ko mansube ko darpesh masail se bhi agah kiya gaya.

Commissioner Salahuddin Nurzai ne kaha ke Dera Murad Jamali sharqi side par taqriban 2 arab 50 crore rupay ki lagat se jari project awam ki zindagi mein musbat tabdeeli laye ga, is liye tameerati miyar par kisi qism ka samjhauta nahin kiya jaye ga.

Unhon ne hidayat ki ke bil-khusus peene ke saaf pani, sewerage nizam aur nalon ki grading par khusoosi tawajjoh di jaye, mansube ki musalsal nigrani yaqeeni banayi jaye aur mustaqbil ki zarooriyat ko madde nazar rakhte hue tamam taraqqiyati kaam barwaqt aur miyari andaz mein mukammal kiye jayen taake awam ki tawaqqoat par poora utra ja sake.

Tasveer: Bashukriya DGPR Balochistan