Deputy Commissioner Quetta Mehrullah Badini ki Khuli Kachehri, shehriyon ke masail sun kar fori izaley ke ahkamat

Quetta: Deputy Commissioner Quetta Mehrullah Badini ki zer-e-sadarat Khuli Kachehri ka inaqad kiya gaya, jis mein shehriyon ne apne masail, shikayat aur mushkilat se zilai intezamiya ko barah-e-rast aagah kiya. Deputy Commissioner ne shikayat tawajjuh aur tahammul se sunin aur mutalliqa mahkamon ke officers ko fori izaley ke liye zaroori hidayat jari kin.

Khuli Kachehri ka bunyadi maqsad awam aur zilai intezamiya ke darmiyan barah-e-rast rabte ko mazeed mu’assir banana, shehriyon ko shikayat ke izhar ke liye aasan platform faraham karna aur sarkari idaron ki janib se awami masail ke hal ka amal tez karna tha. Shehriyon ne bunyadi shehri sahulatein, safai suthrai, sarkon aur nikasi-e-aab, pani, tajawuzat, revenue se mutalliq umoor, sarkari khidmat ki faraahmi aur deegar intezami nauiyat ki shikayat pesh kin.

Deputy Commissioner ne yaqeen dehani karayi ke awami shikayat ka barwaqt izala zilai intezamiya ki awwaleen tarjihat mein shamil hai. Unhon ne officers ko hidayat ki ke Khuli Kachehri mein pesh kiye gaye masail ko mehaz shikayat tak mehdood na rakha jaye balke un ke hal ke liye amli iqdamat kiye jayein aur muqarrara muddat ke andar pesh raft se aagah kiya jaye. Unhon ne kaha ke awami masail ke hal mein kisi qism ki ghaflat, takheer ya ghair zaroori rukawat bardasht nahin ki jaye gi aur tamam mahkame bahami rabte aur mu’assir coordination ke sath kaam karein takay shikayat ka mustaqil aur qabil-e-amal hal yaqeeni banaya ja sake.

Deputy Commissioner ne kaha ke zilai intezamiya awami masail ke hal ke liye tamam dastiyab wasail barwe-kar la rahi hai aur koshish hai ke shehriyon ko sarkari daftar ke ghair zaroori chakkar na lagane parein balke un ki shikayat un ki dahleez par sun kar mu’assir andaz mein hal ki jayein. Khuli Kachehriyan awam aur intezamiya ke darmiyan faasle kam karne aur masail ke fori hal ka aham zariya hain.

Mehrullah Badini ne mazeed kaha ke awami khidmat aur shehriyon ko barwaqt relief ki faraahmi zilai intezamiya ki bunyadi zimmedari hai, intezamiya is silsile mein purazm hai aur Khuli Kachehriyon ke zariye awami masail ki barah-e-rast nishandahi aur un ke hal ki nigrani ka silsila jari rakha jaye ga.

Tasveer: Bashukriya DG PR Balochistan