Deputy Commissioner Quetta Mehrullah Badini ki e-commerce o IT lab do hafton mein mukammal karne ki hidayat

Quetta: Deputy Commissioner Quetta Mehrullah Badini ki zer-e-sadarat jadeed e-commerce o IT lab ke tameeraati kaam ko jald mukammal karne ke hawale se ijlas munaqid hua, jis mein Commandant 115 Wing, Additional Deputy Commissioner General, XEN C&W, Architect C&W, IT se mutalliq members aur constructor samet deegar hukkam ne shirkat ki.

Ijlas mein lab ke jari tameeraati kaam, pesh raft aur darpesh masail ka tafseeli jaiza liya gaya. Deputy Commissioner ne mutalliqa hukkam aur constructor ko hidayat ki ke baqi manda kaam tez raftari se mukammal kar ke mansoobe ko do hafton ke andar paya-e-takmeel tak pahunchaya jaye.

Unhon ne wazeh kiya ke takmeel mein kisi qism ki ghaflat, sustii ya kotahi bardasht nahin ki jaye gi aur kaam ke miyar par bhi koi samjhauta nahin hoga. Unhon ne afsaran ko pesh raft ki musalsal nigrani ki hidayat ki taake lab muqarrara muddat mein faal ho sake.

Mehrullah Badini ne kaha ke jadeed IT o e-commerce lab nawjawanon ko jadeed technology, digital maharaton aur e-commerce ke shobe mein mawaqe faraham karne mein aham kirdar ada kare gi.

Tasveer: Bashukriya DG PR Balochistan